Shillong, Lber 07:
U MLA ka National People’s Party (NPP) na North Tura, u Thomas Sangma, u la leit ban thep kyrteng kum u kyrtong ka kynhun synrop Meghalaya Democratic Alliance (MDA) na ka bynta ban ïakhun ïa ka ilekshon ban shahjied kum u Lamphang ka Ïingdorbar Thawaiñ kaba khatwei ka Jylla.
U Thomas u la leit aiti ïa ki kot ki sla thep kyrteng jong u ha ka sngi ba-ar ha u Commissioner and Secretary ka Assembly Secretariat, u Andrew Simons ha ryngkat ka jingsynran lang kiwei ki MLA.
U Thomas u la long u MP ka Rajya Sabha na Meghalaya naduh u snem 2008 haduh 2012, bad u la shahjied nyngkong kum u MLA ka North Tura ha ka ilekshon 2018 bad ha u snem 2023 u la shahjied biang kum u MLA ka North Tura ha ka sien ba-ar.
Namarba ym don ba thep kyrteng na ka kynhun Liang Pyrshah kiba kynthup ïa ka Congress, TMC bad VPP, u Thomas un dei u Lamphang uba shahjied khlem kano kano ka jingïakhun.
Ka sngi kaba la buh ban pynlong ïa ka ilekshon ban jied ïa u Lamphang ka dei ha ka 9 tarik Lber, hynrei haba ym don shuh ka ilekshon, u Protem Speaker, un shu pynbna beit ïa ka kyrteng u Thomas kum u Lamphang uba thymmai ka Ïingdorbar Thawaiñ kaba khatwei ka Jylla hapoh ka Ïingdorbar Thawaiñ ha katei ka sngi.
Haba ïakren bad u nongïalam ka Congress Legislature Party (CLP), u Bah Ronnie V Lyngdoh, u la ïathuh ba na ka liang ki seng saiñ pyrthei kiba don sha ka liang pyrshah, ki la rai lang ban nym buh kyrtong namar ka dei hi ka rukom ba ïa u Lamphang dei ban jied khlem kano kano ka jingïakhun bad ïa kane la ju leh ruh ha ki por ba la leit.
‘Ngi la rai ban nym ïakhun namar kum ki dkhot ka ïingdorbar, ngi ngeit bad khmih lynti ba u Lamphang kum u nongpeit nongkhmih ïa baroh ki dkhot, u hap ruh ban peit lut ïa baroh ki dkhot bad long pdeng ïa baroh,” la ong u Bah Ronnie.
