Shillong, Lber 08:
Napdeng ki 59 ngut ki MLA ka Ïingdorbar Thawaiñ ba khatwei ka jylla, 17 ngut ki dei kiba la pyndep ïa ka jingpule tang haduh Klas 8 lane Klas 10 lane Klas 12.
Kane ka la paw ha ka kaiphod ba la ai da ka Association for Democratic Reforms (ADR), New Delhi kaba la peit bniah ïa ki kot ki sla jong kine ki MLA.
La pyntip ba arngut ki MLA ki dei kiba la pyndep tang ïa ka Klas 8, hynriew ngut ïa ka Klas 10 bad khyndai ngut ïa ka Klas 12. Nalorkata, la pyntip ba 19 ngut ki MLA ki dei kiba la pyndep ïa ka ‘Graduation’, hynriew ngut ki dei ki ‘Graduate Professional’, 13 ngut ki dei ki ‘Post Graduate’, kawei kaba la pyndep ïa ka ‘Doctorate’ bad lai ngut kiba don ïa ka ‘Diploma’.
Ha kaba ïadei bad ka rta jong ki MLA, 2 ngut ki dei kiba hapdeng 25 haduh 30 snem, 15 ngut hapdeng 31 haduh 40 snem, 20 ngut hapdeng 41 haduh 50 snem, 18 ngut hapdeng 51 bad 60 snem, 3 ngut hapdeng 61 haduh 70 snem bad uwei uba don hapdeng 71 haduh 80 snem.
Shuh shuh ka kaiphod ka la pyntip ba na ki 59 ngut ki MLA, 3 ngut ki la pynpaw ba ki don ki ‘case’ pyrshah ïa ki. 2 ngut na kine ki la pyni ba ki ‘case’ pyrshah ïa ki, ki long kiba khia.
Nalorkata, lah ban kdew ba napdeng ki 59 ngut ki MLA ba mynta, haduh 45 ngut lane 76% ki dei kita ki ‘crorepati’ lane ki MLA kiba ka jingdon jingem bad ka spah ka phew ka long palat T. 1 klur. Kiba bun na kine ki MLA heh spah ki dei na ka NPP ha kaba na ki 26 ngut, 20 ngut ki dei kita ki ‘crorepati’.
