Nongpoh, Lber 08:
U Bah Mayralborn Syiem hadien ba u la shah jied biang kum u MLA jong ka Nongpoh konstitwensi ha ka sien ba ar, u la ai ka jingkhublei kyrpang sha baroh ki paidbah jong katei ka konstitwensi khamtam kito kiba la kyrshan radbah ba un nang lah ban bteng ïa ka jingshakri na bynta ka thaiñ bad ka district hi baroh kawei.
U Bah Mayralborn u la pynpaw ïa kane haba kren sha ki lad pathai khubor ha ïingsah ka jong u ha Pahamlapong ha ka Sngi Balang. U la ong ba ka kam nongmihkhmat kam dei satia kaba suk namar ka lyngkor ka long kaba khia ha kaba u la kyrpad ïa ki paidbah ka konstitwensi ba kin ai ïa ka jingkyrshan lem ïa u khamtam ba kin buh ha ki jingduwai khnang ba un nang lah ban shakri khambha shuh ïa ki jingdonkam jong ki paidbah ha kine ki san snem ki ban wan.
Katto katne na ki mat kiba kum u MLA un shimkhia ban buddien ki dei ban pynurlong ïa ka jingangnud ban pynrung noh ïa ka ktien Khasi ha ka Khyrnit kaba Phra jong ka riti synshar treikam ka ri, ban pynïoh ïa ka Medical College, ban shimkhia ba ka Northern Ri Bhoi College kan dang kiew irat shaphrang, ban plie noh ïa ka Industrial Training Institute (ITI) ha Nongkhrah bad ruh ban shimkhia halor ka ïoh kam ïoh jam jong ki khun samla ka thaiñ nalor ban kyntiew ïa ka koit ka khiah bad ban buddien na ka bynta ban wanrah ïa ka C&RD Block ha Umden.
Ha kaba ïadei bad ka Medical College, u MLA u la ong ba kum kawei na ki 112 tylli ki ‘Aspirational District’ ha ka ri, ka Ri Bhoi District ka don hok ban ïoh bad un shimkhia ïa kane ka bynta tad haduh ba kan da urlong khnang ba kan long ka jingmyntoi ïa ki khun samla jong ka district bad ka jylla hi baroh kawei.
Halor ka jingdonkam ban ïoh noh ïa ka C&RD Block ha Umden, u Bah Mayralborn u la ong ba lada kane ka bynta kan urlong, kan long da shisha ka jingmyntoi kaba khraw ïa kiba bun tylli ki shnong ha katei ka thaiñ, namar kumba long mynta, ki paidbah na kitei ki shnong ki hap ban leit shaduh Umling C&RD Block kaba la jngai bad buh jingeh shikatdei ïa ki.
Shuh shuh u Bah Myralborn u la ong ruh ba kam dei kaba suk ban pynurlong ïa baroh kitei ki jingangnud shisien leh, hynrei na ka liang ka jong u, un ïai pyrshang katba don la ka buit ka bor halor kitei ki jingangnud bad jingkhmih lynti jong ki paidbah, khamtam ba mynta ka kynti, u la ïoh ban ïadon bynta lang bad ka sorkar jylla. Kumta u la kyntu ïa ki paidbah ba kin ai ïa ka jingïatrei pura khnang ba ka konstitwensi bad ka district hi baroh kawei kan kiew shaphrang ha baroh ki liang jong ki kam pynroi.
