Shillong, Lber 08:
Wat la ki ar ngut ki MLA ka HSPDP kim kwah ban kren eiei halor ka jingbym lah ban thaw ïa ka sorkar da ki seng riewlum ka ban lamkhmat da ka seng UDP kaba don 11 ngut ki MLA, hynrei ki khubor kiba jan bha ki ïathuh ba ka jingleit ai jingkyrshan noh ka jong ki ïa ka seng NPP ka dei namar ba ki nongïalam ka UDP ki shim sting ban thaw ïa ka sorkar da ki seng riewlum.
Ki khubor ki ïathuh ba ha ka 3 tarik Lber, shi sngi hadien ba la dep ñiew vote, ki arngut ki MLA ka HSPDP ki la poi ha ka ïing sah jong u Myntri sorkar barim, u Bah Lahkmen Rymbui, ha Shillong hadien ba ka UDP ka la khot da ka jingïalang jong baroh ki MLA kiba la jop na ki seng riewlum.
Nalorkata, ki khubor ki ïathuh ba haba ki MLA ki la poi ha ïing sah jong u Bah Lahkmen, ki la hap ban ap haduh lai kynta ïa kiwei pat ki paralok MLA kiba thmu ban thaw ïa ka sorkar.
Shuh shuh ki khubor kiba jan ki la pyntip ba ki MLA ka seng HSPDP ki la shu peit lyngngoh ïa ka jingmih jingrung ki MLA ka UDP ban ïakynduh tang para ma ki hapoh ka jingïalam u Bah Metbah Lyngdoh kum u President ka UDP, khlem da khot lang ïa ki MLA ka HSPDP.
Ki khubor ki la ïathuh ruh ba ki MLA ka HSPDP haba ki la ïoh jingtip ba ka jingslem ka UDP ban lum ïa ka jingïalang ka dei namar kane ka seng ka la dep ïakren bad ki nongïalam ka NPP ban thaw ïa ka sorkar thymmai, ki arngut ki MLA ka HSPDP ki la mih noh na ka jingïalang. Nalorkata, wat haduh 3 baje janmiet ruh, ki don ki MLA kiba dang shu wan sha ka jingïalang.
Nalor kata, ki khubor kiba jan ki la ïathuh ba hadien ba ki seng ki la dawa ban thaw ïa ka sorkar seng riewlum, ki ar ngut ki MLA ka HSPDP ki la kloi ban wan ïatreilang lada ka UDP ka biang briew. Hynrei ki khubor ki la ïathuh ba kata ka jingthmu ban thaw sorkar kan ym urlong naba ki arngut ki MLA shimet ki la leit ban ai jingkyrshan ïa ka kynhun synrop NPP bad BJP.
Shuh shuh ki khubor ki ïathuh ba ki MLA ka HSPDP kim kwah ban kren eiei mynta halor ka jingmih ki kynrum-kynram bad kin sa pynshai kham bha ïa ki jingjia baroh hadien katto katne por.
Kum ban shu pynkynmaw ka la don ka jingthmu ban thaw ïa ka sorkar seng riewlum ban lamkhmat da ka UDP ha ryngkat ka jingkyrshan lang ka VPP, PDF, Congress, TMC, HSPDP. Hynrei kane ka jingthmu ka la shu pulom noh tang hapoh khyndiat kynta.
