Imphal, Lber:
Ki bor pulit jong ka jylla Manipur ha ka Sngi Ba-ar mynta ka taiew ki la pyntip ba ki la ïoh ban kem ïa uwei u runar ïa uba la suba jur ba u dei uba ju donkti ha ki kam ban pynïaid iew beaiñ ïa ki tiar siat. Ïa utei u runar, ki bor pulit ka jylla ki la ïoh ban kem hadien ba ki la leit ban pynlong ïa ka jingkhynra ha ka shnong Nongpok Sekmai ha ryngkat ka jingwan ïashim bynta lem ki bor shipai ka tnat Assam Rifles.
Na katei ka jingleit khynra jong ki bor pahara la ïathuh ba ki la ïoh ban kem ïa uwei u samla (23 snem ka rta) bad na ka met jong u la ïoh ruh ban kurup ïa kawei ka pistol 9mm.
Kat kum ka jingpyllait kyrwoh jong ki bor pahara, ki la pyntip ba ïa katei ka jingleit khynra ha katei ka sngi la pynlong da ka kynhun shipai na ka Keithelmanbi Battalion hapoh ka jingkhmih trei kam jong u Inspector General of Assam Rifles(South), bad ki bor pulit ‘commando’ ka thaiñ Thoubal district.
Ïa utei u runar u ba la shah kem ha katei ka sngi, lem bad ïa ka tiar siat ba la ïoh bankurup la leit ban aiti noh sha ki bor pulit ka Nongpok Sekmai Police Station na ka bynta ban pynlong ïa ki jingtohkit kiba dang sah.
