Shillong, Lber 08:
U President ka People’s Democratic Front (PDF) u Bah Gavin M Mylliem uba dei ruh u MLA ka Sohra konstitwensi, u la ong ba haba long nongmihkhmat paidbah, kam dei tang ban long Myntri beit, hynrei ka thong ka long ban ai jingshakri ïa ki paidbah ha ki kyrdan bapher bapher.
Katkum ka jingïathuh u Bah Gavin, ka PDF ka la kyrshan lang ïa ka Sorkar MDA-II lyngba ka jingkhot u Myntri Rangbah u Conrad K Sangma bad ym don kano kano ka jingong ba sngewsih ne ym sngewtynnad, namar ka PDF ka wan kham hadien ban ai kyrshan lang.
Ka PDF kaba don 2 ngut ki MLA kam shym la ïoh bhah lang hapoh ka Kynhun Myntri ha kaba kiwei ki seng kiba kyrshan ïa ka Sorkar kum ka UDP, BJP bad HSPDP ki ïoh bhah lang ban pynrung Myntri.
“Kum ki nongmihkhmat paidbah, kam dei eh tang ban long Myntri, hynrei ngi don ban ai ka jingshakri ha kano ka kyrdan kum ki nongmihkhmat ba la jied da ki paidbah,” la ong une u President ka PDF.
U Bah Gavin u la ong ba na ka liang u Myntri Rangbah u la kynthup lang ha ka Sorkar ïa ki MLA ka PDF, hynrei ym don kano kano ka jingïakren ban pynrung hapoh ka Kynhun Myntri.
Haba kylli, la ka jingwan slem ka PDF ka dei ka daw bym ïoh Myntri, u Bah Gavin u la ong ba ka dei ka jingshisha ba ka la kham suki ka jingleit ai jingkyrshan, hynrei lada ka kham kloi ka jingïakren, lehse kan long da kumwei.
Kumta u la ong ba ka PDF kan ïatreilang bad ka Sorkar na ka bynta ka jingroi bad kiew shaphrang ka Jylla bad ka seng kan bteng ruh ban rah ïa ki mat kiba dei na ka bynta ban kham pynbha ïa ka jingtreikam jong ka Sorkar ka ban long ka jingmyntoi ïa ki paidbah ka Jylla.
