Shillong, Lber 08:
Ka Ïingdorbar Thawaiñ ka jylla ha ka Sngi Palei kan sa ïoh da u Lamphang khlem da donkam ïa ki MLA ba kin ïa thep ‘vote’.
U Thomas A Sangma, MLA ka NPP na North Tura, un long u Lamphang bathymmai naduh ka Sngi Palei. U Thomas un long napdeng ki katto katne ngut ki Lamphang ki ban shah jied khlem da donkam ban ïakhun pyrshah ïano-ïano.
Ha u snem 2013, u Abu Taher Mondal jong ka Congress, uba mynta u long kum uwei na ki Myntri ha ka sorkar MDA 2.0, u la shah jied sha ka shuki Lamphang khlem da ïakhun pyrshah.
Mynta ka kynti ruh, ka liang pyrshah, kaba don tang 14 ngut ki MLA, ka khlem wan shakhmat ban buh kyrtong namar ka la sngewthuh lypa ba kan long tang kum ka jingpyndep rukom. Ka liang synshar hapoh ka kynhun MDA 2.0 ka don haduh 45 ngut ki MLA bad namarkata, kan ym don jingeh eiei ïa u Thomas ban shah jied sha ka shuki Lamphang.
Haduh ba kut ka sngi thep kyrteng ha ka 7 tarik Lber, dei tang u Thomas, uba la long MLA mynta la arsien kynthih bad hashwa kata kum u MP ka Rajya Sabha, uba la wan shakhmat ban thep kyrteng na ka bynta ban ïakhun ïa ka ilekshon ban jied ïa u Lamphang bathymmai.
Nalorkata, ka Ïingdorbar Thawaiñ kan ïoh da u MLA na ka jaitbynriew Garo ban long kum u Lamphang hadien bun snem. U Martin M Danggo u la long u Lamphang bakhatduh napdeng ki riewlum Garo ha kaba u la don ha ka shuki naduh u snem 2003 haduh 2008.
