Aizawl, Lber:
Ki bor pulit jong ka jylla Mizoram ha ka Sngi Ba-ar mynta ka taiew ki la ïoh ban kurup ïa haduh 17 tylli ki mrad khlaw kiba kham ñiar ban shem ha ri India, ïa kiba la suba jur ba la wan ban pynpoi beaiñ na Myanmar. Ïa kitei ki mrad khlaw, ki bor pulit ki la ïoh ban kurup na kawei ka kali kaba dang ïaid lyngba ka surok Khawzawl – Rabung. Ïa kitei ki mrad khlaw, ki bor pulit jong ka jylla ki la ïoh ban kurup ha ka por ba ki la leit ban pynlong ïa ki jingkhynra bad talasi ha katei ka surok.
Katkum ka jingïathuh jong ki bor pulit ki la pyntip ba ïa katei ka kali la ñiah da uwei u briew u ba la tip kyrteng kum u Vanlalrawna – u nongshong shnong ka thaiñ Zokhawthar.
Na katei ka kali, ki bor pulit ki la ïoh ban kurup ïa haduh 13 jait ki sim bad 4 tylli ki shrieh.
Ïa ki mrad khlaw kiba la ïoh ban kurup ha katei ka sngi bad ïa ka kali ba la pynkit ïa ki la leit ban aiti noh sha ki bor sorkar ka Customs Preventive Force, Champhai na ka bynta ban pynlong ïa ki jingtohkit kiba donkam.
Katkum ki jingïoh lum khubor la ïathuh ba ka jingshalan bad khaïi beaiñ ïa ki mrad khlaw kynthup ïa ki sim ki doh ka dei kawei na ki kam beaiñ ba dang kynrei bha ha ka jylla Mizoram bad ha ki snem kiba la leit, ki bor sorkar ki la ïoh ban kurup ïa bun tylli ki mrad khlaw bad la ïoh ruh ban pynrung ïa bun tylli ki mokotduma pyrshah ïa ki runar ba donkti ha katei ka kam beaiñ.
