Bah Raphael Warjri
Ka long kaba donkam ban tip la ka thymmei longbynriew manbynriew khnang ban ym sah khyllung khynnah hakhmat ka pyrthei. Kumta ym dei ban tynneng, ym dei ban tohhoh, ym dei ban pyrthuh bad ym dei ban ñiewbeiñ ia ka lajong bad rahskong ia ka jong kiwei. Namarkata dei ban tip, ban minot ban duriap, ban thwet, ban phrang, ban kynshew bad ban pynneh la ki snap ka thymmei lajong da ja jingtip kaba skhem khlem artatien ban pynïeng rasong ïa ka lajong bad pyrto ïa ki matti jong ki longshwa man-shwa. Shwa ban pur nia sha kano kano ka phang la sngewdei ban kdew ia kiei kiei ki ba la leh torti bad thurmur ha ki pateng ba la leit.
Kumta la dei ban ïa tai ïa thir bha ïa ki ktien nongwei ba lah pyndonkam salonsar ha ka imlang sahlang kiba lah ban ïa sngewthuh paidbah. Ha kane ka rukom don ki ktien ba lah ban pakhuh bad kulmar pynban, ha ka ba la dei ban husiar. Ki ktien ïapan na ki ‘tien nongwei kiba lah pyndonkam khah khah bad sngewthuh da u ba bun ba lang ki don byllai. Kumjuh ruh don ki ktien tynrai Khasi kiba don ar jingmut ne palat ba ïa pakhuh ha ka thoh ka tar. Katto katne na kita ki ktien ki long:
Fresh (phresh) kaba mut Ba dang im khriak khriak
Compare (komper) – Ïa nujor
Experience (ekspirians) – Ba lah mlien
Flop- (phlop) ka ba mut Bijai ne sep ei
Drugs (droks) – ka ba mut U kynja aphin ne kuli dawai pynbuaid
School (Skul) – ka ba mut Ka ïing ka sem hikai thoh hikai pule
Draw (dro) – ka ba mut Ruid dur ruid dar
Point (poiñ)- ka ba mut tduh, mat, thew, dorthong
Spell (spel)- ka ba mut Ban pule kyntien na ki dak thoh
Spare (sper)- ka ba mut Ban buh lypa, khreh lypa, pynap
Glass (klat) ka ba mut Tyndong dih um, Khuri, Jhoh (Bhoi)
Pin (pin) ka ba mut Narsuh, nardung
Dot (dot) ka ba mut U phngit symbai barit ria shi tylli.
Clip (Klip) ka ba mut Khnap lane nap pyndait shñiuh ba rit ba stang.
Act (ak) ka ba mut Ba leh myn leh, pyrthuh jingleh jong kiwei.
Godown (Kudam) ka ba mut Khrum buh lane set tiar, kynshew nongra.
Lantern (lynten) Sharak
Football (phutbol) kaba mut Ka jingïalehkai phutbol
Dost (dos) – kaba mut Paralok ha ka ktien Hindi
Bottle (bitor)- kaba mut U kum, klong. Teng teng la ju ong ruh u bilor.
Kettle (ketli)- kaba mut Daron, Shapushi
Ki ktien kiba la shu pule beit na ka jingkynnoh ha ka ktien phareng:
Taxi (Taksi) kaba mut Ka mar ñiah shalyntem ba kitnong ïa ki paidbah ban leit jingleit.
Choice (shois) kaba mut Jiedmon.
Trace (tres) kaba mut Ba paw ne ïohi lyngba, ba pyrshi
Baroh kine ki ktien haneng dei kiba la shim kylliang na ka ktien phareng bad Hindi. Lada dei ban pynneh ne ban kyntait ha ka ban kynthup ha u sup u thiar ka Ktien Khasi, to ngin tohkit bad jurip sani kawei pa kawei kumne harum:
Try (trai) – kaba mut Ba pyrshang phong ne pyrshang trei ne leh ïa kaei kaei.
Kane ka ktien ka lah ban ïa pakhuh bad ka ktien tynrai Khasi ‘Trai’ kaba lah ban mut Trai kum ïa ka ktien Kynrad lane Trai kum ka Tbian. Haba kren ka biang namar la kynnoh ‘trai’ ba pynlyngkut ia u ‘a’ kumba kynnoh phareng; ym dei trai ba pynjlan ïa u ‘a’ kaba don ar jingmut Kynrad bad Tbian.
Shock (shok)- kaba mut Kyndit ba kylla na ka ktien phareng. Hynrei ka lah ban ïa pakhuh bad kawei pat ka ktien phareng Chalk (shok) – kaba mut u Mawthoh. Kane ruh ka ïa pakhuh bad ka pynkulmar namar ha ka Khasi la pule ne spel kumjuh.
Tyre (taïar)- ka ba mut Shalyntem, shaka. Hynrei la pyndonkam ruh na ka ktien Hindi ka ba mut ban khreh. Nangta Shaka kum ka shalyntem pat ka wan na ka ktien Sanskrit/Hindi Chakra. Kumta kane kan pynkulmar ha ka thoh kot thoh sla, wat la ka lah ban biang haba kren.
Change (sheiñ)- ka ba mut Kylla, Kylliang, bujli ha ka ktien Khasi. Hynrei ïa u lynter bniat nar ba pyndait pdok ne jaiñ phong ruh la kynnoh kumjuh ka ba ha ka ktien phareng la pule Chain. Kane ka juh ka ktien phareng Chain ka mut ruh ïa ki kynja lynter basa. Kumta kane ka kulmar ha ka thoh ka tar wat lada sngethuh ha ka kren ka khana.
Installment, Instrument- kaba mut Ban siewbateïa
Stai – kaba mut Ba jlop ne ïap tyrkhong. Hynrei ka juh ka jingkynnoh ka mut ha ka ktien phareng Style (stai) ka ba mut ba dait riam. Kumta ka ïa pakhuh bad ka lah ban kulmar haba thoh, wat la ka biang ha ka kren ka khana.
Saiñ – kaba mut Ban phrang pynjanai ïa kano kano ka mar. Kane ka ktien tynrai Khasi ka ïa pakhuh bad ka ktien phareng Sign ka ba mut ba soi kyrteng ha ki kot ki sla, ki syrnot bad dulir ba la pule ha ka ktien Khasi da kajuh ka ktien saiñ. Ka don kawei pat ka jingmut ka ba mut ki dak ki shin.Kumta kane kan pynkulmar ha ka thoh kot thoh sla, wat la ka lah ban biang haba kren.
Step – kaba mut Dang ngir mar ïa mih sngi ha ka ktien tynrai Khasi. Hynrei ha ka ktien phareng Step – la sngewthuh ha ka Khasi ruh kum ki Mawkyndon. Kumta kane ka ktien ka lah ban ïa pakhuh bad ka ktien tynrai Khasi ‘Step’ ka ba ha ka ktien phareng ka mut – Morning. Ki dak thoh ruh ki long kumjuh ha ka Khasi bad phareng bad ki lah ban kulmar, wat la ka biang ha ka ba kren.
Pipa – kaba mut Ka mar kynshew um ne u kum ba radbah. Ha ka ktien phareng ka mut Tub bad la ju pyndonkam da ka ktien Khasi da kaba pule Top. Hynrei Top ha ka ktien phareng pat ka mut kliar ha ka ktien Khasi.
Shut – ka ba mut Ban pynnep ïa ka wait ka tari da ka ba kyrshut ha u mawshynrut ne uno uno u kynja maw jlih. Hynrei ïa ka ktien phareng Shoot la pule bad kynnoh kumjuh (shut) kaba mut pat ban kynjat ïa ka bol. Hangne ka ktien bol ruh la pynwan na ka ktien phareng Ball ka ba mut ïa ka soh snep jri ne snieh ka ba kyllaiñ mlon.
Sher – kaba mut Ka ‘tien siat pharshi da ki kyntien kyoh mynthi. Ka mut ruh ïa ki kynja dohkha rit ba ju khot Sher Syngkai. Ïa kane ka kyntien la kynnoh kumjuh ha ka ktien phareng Share (sher) kaba mut ban ïa sam lem. Kumta ka ïa pakhuh bad ka lah ban kulmar haba thoh, wat la ka biang ha ka kren ka khana.
Laiñ – kaba mut Ba saw kyrang laiñ lane ba kynthah laiñ (hangne kynnoh jlan ïa u ‘a’). Hynrei la thoh kumjuh ha ka jingmut ïa u dak ruid ne u thor (Ktien Amwi) ka ba la shu kynnoh pynbiang beit na ka ktien phareng Line.
Sieb – kaba mut Ba at phyllung ka sniehdoh ne kano kano ka mar. Hynrei kane ka juh ka jingkynnoh ka ïahap bad ka ktien phareng Save ka ba mut ban Kynshew ne buh rneng. Kumta ka ïa pakhuh bad ka lah ban kulmar haba thoh, wat la ka biang ha ka kren ka khana.
Op – ka ba mut Ba set kdup khlem lait lyer ne ïap op. Hynrei la ju mlien ban ong op ka ba mut u thieb ka ba ha ka ktien phareng ka dei Up. Kumta ka ïa pakhuh bad ka lah ban kulmar haba thoh, wat la ka biang ha ka kren ka khana. Mynta leilei ka lah ban pakhuh sa bad ka ktien phareng ‘opt’ ka ba mut ban jied bujli noh da kawei ha ka ktien Khasi.
Ka Synjuk Ki Taithoh bad Traikhlieh Pathai Khubor na Jylla (Meghalaya Editor and Publishers’ Association) ka syllok bad ka Synjuk Ki Thohjer Thohnam (Khasi Authors’ Society) na ka bynta ban pynbit pynbiang ryntih ha ka thoh ka tar da ki ktien ba kynsai bad ïadei dur katkum ka jingthoh. Na ka daw ba donkam kyrkieh ha ki kotkhubor Khasi bad kyllum ha ka thoh ka tar salonsar ka Riti Academy ka la lum thup ban thwet ki ktien na kylleng ki thaiñ, ban shna kyntien thymmai bad ban pynwandur katkum kiei kiei jong ka juk mynta lyngba ka Shlem Baïar Dienshonari Khasi ne Khasi Expansive Dictionary project na ka bynta ban kyrsoi bad pynroi shuh shuh ïa ka ktien Khasi. Kumta ki paidbah ki lah ban kynthoh kum ban ia donkti lang ha ka ba pynjanai ia ka kam da ka ba phah ki jingai jingmut sha ritiacademy [email protected].
