U Sumar Sing Sawian
Haba bishar bniah bha, lah ban iohi bad ruh lah ban shem, ba ka ktien Khasi ka long kawei na ki ktien kaba riewspah tam hapoh pyrthei. Khamtam ha kaba iadei ba ki ktien kynnoh bad ruh ia ki kyntien ba pyndonkam ha ki jingphawar. Ki long da shisha ki kyntien, kiba don ka biria, hynrei ha kajuh ka por, kiba long ki kyntien kiba kit jingmut, kiba Jylliew haduh katta katta, kiba long ruh ki kyntien kiba siat pharshi. Lada peit shwa ia ki kyntien kynnoh, ngi ioh ar tylli ki kyntien kiba kit ia tang kawei ka jingmut. Kane ka kdew bad pyni ia ka jingriewspah jong ka ktien haba kren, haba thoh, bad haba pyndonkam ia ka. Kine ki long khyndiat ki nuksa. Ka AIKUM – AIKLONG. U KUM, u mut u khiew ne phiang buh um, hynrei u kit jingmut ruh ia u KLONG, uba dei ruh uba buh ia ka um ne kano kano ka jingdih.Haba phai sha ka kyntien KHUBOR, ka kyntien kynnoh ka dei ka ANTOR. Ka ‘tien kynnoh ANTOR ka iahap bad ka kyntien Phareng ADVERTISEMENT. Lada don ka KHUBOR namar kaba ka don ruh ka ANTOR. Ka kyntien KHRONG, kam mut tang ia kito kiba shu khrong, kaba ki nongkhrong, hynrei ka thew ia ka khrong ban pynrung ia ki mar ki mata sha ki ïew ki hat, ka khrong shnng khrong thaw bad kiwei kiwei. Kumta ka kyntieng KHRONG ka bun ki ‘tien kynnoh. Kum ka KHRONG KA DAN, Ka KHRONG KA ASIR, ka KHRONG KA TLIENG. Haba phai pat sha ka longïing ka longsem, ki don ki KHUN bad ka ‘tien kynnoh pat ka dei KTI. Kumta ngi ioh ia ki KHUN KI KTI, KI KHUN KI NAT, KI KHUN KI KSIEW, KI KHUN KI PYRSA. Nangta KI KHUN KI HAJAR, jong ki it ki hima, kiba long ki trai it trai hima, ki trai raij trai muluk. Nalor ki KHUN KI HAJAR, ki don ruh ki KHUN KI RAIOT. Jong kito ki briew ki bym dei ki trai tynrai jong ka it ka hima, ka raij ka muluk, ia ka Ïing ba pynshong, ba ri ba sumar sukher, ia ki riti ki dustur, ki Lariti, bad ka Longniam Longrukom jong kano kano ka hima ha Ri Hynñiewtrep, la khot ia kum kata, Ka IINGSAD IINGSUNON. Lah ruh ban khot kum ka IINGSAD IINGDOR. Te ha kaba iadei bad ki jingtrei ki jingktah kiba pher bapher, ka tien kynnong ka long, KA TREI – KA KTAH, KA KHIH KA KHAN, KA KAMAI KA KAJIH, KA KHIH KA KAMAI, kiba long ki JINGTREI JINGKAH, ban nang kyntiew ia ka IOH KA KOT, ban ioh ia ka KYNSHEW KA KYNDIAP, ban roi ban kami KA SPAH KA PHEW, lyngba KA UMSYEP KA UMSYIAR. Ia u ‘riew pyrkhat, u riew shemphang, u riew proh jabieng janor, u riew heh u riew haiñ, la ju tip ia kum kita ki briew kum ki KYNREM KI LYNDAN, kiba dei ruh Ki RANG KHRAW NIA – KI KHRAW JUTANG. Kino kino ki briew, katkum ka jingtrei bad jingtheh umsyep ka jong ki, ki ioh ia ka BAINONG ka BAINI, ka BAISIEW KA BAITDA ka Jong ki. Khnang ban ioh ia ka BAM KA SA. Nangne shakhmat, yn dang ia bteng shuh shuh ia ka Ktien Khasi Ba Iar,’ kaba iadei bad ki kyntien Phawar ia kiba ki nongphawar, ki thaw ia ki kyntien ha kato hi ka khyllipmat, kiba don ka bria, ka pharshi bad kiba kit jingmut.
