Hadien ba ka sorkar MDA 2.0 ka la shimti ïa ka jingsynshar, baroh ki jingïakheiñ ïadiah ha kaba ïadei bad ki nombor ka la poi sha kaba kut. Kumba ka long mynta, ka liang synshar ka don haduh 45 ngut ki MLA katba ka liang pyrshah ka don tang 14 ngut. Ngim tip ka Sohïong konstitwensi kan jied ïano ynda la dei ka por thep ‘vote’. Hynrei ha ka synshar paidbah, ngi donkam ïa ka liang pyrshah kaba khlaiñ bad kaba lah ban peitngor ïa ka jingtreikam jong ka liang synshar. Ngi sngewthuh ba ka liang synshar khamtam ka NPP, kaba don 26 ngut ki MLA, ka la kiew skong namarba la ïa bun briew. Ki seng kiba kham rit ki la shu ïoh shuki Myntri tang ar ne kawei bad don ruh ba khlem ïoh. Ka NPP kam da donkam than ïa shibun tylli ki seng ban kyrshan ïa ka. Namarkata, kane ka jingbymdonkam ka NPP ïa kiwei ki seng kiba kham heh, ka la pynkhlaiñ bor lypa ïa ka. Tangba ka jingsynshar kan dkoh lada ngi don da ka liang pyrshah kaba tlot.
Kumba ka long mynta, ka Congress, Trinamool Congress, kiba don mar san ngut ki MLA, lem bad ka Voice of the People Party (VPP), kaba don saw ngut ki MLA, ki don ha ka liang pyrshah. Ha kane ka liang, ki don ki MLA kiba la kham ïaw bad ih ha ka saiñ hima sima kum u Dr Mukul Sangma, Bah Charles Pyngrope, Bah Ronnie V Lyngdoh, Dr. Celestine Lyngdoh, Saleng A Sangma, Bah Ardent Basaïawmoit, bad u Bah Adelbert Nongrum. Ynda la don ka Dorbar jong ki MLA, ki paidbah kin phai khmat sha kine ki rangbah ba kin rah ïa ki mat ki jura kiba kongsan jong ka jylla. Ngi khmih lynti ruh ba kin don ki khep ba ka jingïatai hapdeng ka liang synshar bad ka liang pyrshah kan khluit bha tar namar la ïakynduh para ba ïadon reng. Ki jingïatai ki dei ban long kiba seisoh, ïar, bad kiba lah ban wanrah ïa ka jingkylla ha ka synshar ka khadar. Kam dei ban shu kut noh tang ha ka jingtied ïa ki miej ne jingtar ïa ki kot ki sla ne ban shu ïa tim ïa tla iwei-ïa-iwei pat. U soh u dei ban mih bad ki jingshisha ki dei ban paw.
Ha kane ka Dorbar ba la dep, ngi la ïohi ïa ka jingïashim bynta ba shitrhem jong ki MLA ha kato ka por kum u Bah George B Lyngdoh, Bah HM Shangpliang, Bah Process T Sawkmie, Bah Adelbert Nongrum, (L) Bah SK Sunn, bad u Bah Mayralborn Syiem. Kine ki nongïalam ki la lah ban pyni shisha ïa ka sap kaba ki don kum ki MLA ban rah bad ban kren ïa ki mat kiba ktah ym tang ïa ki konstitwensi ki jong ki, hynrei ïa ka jylla baroh kawei. Ki MLA haba ki shong ha Dorbar, kim dei ban shu kut tang ha kaba kren ïa ki mat ki ktah ïa ki konstitwensi ki jong ki. Ki dei ban long kiba ïar, bad shemphang ban kren ruh na ka bynta ka jylla salonsar.
Ki don bun bah ki mat kiba hap ban ïakren bad kawei kaba ngi la ïohi na kane ka ilekshon kaba dang shu dep shen ka dei ka jingduk jong ki paidbah kiba bun. Balei ka pisa ka ïoh ban treikam ha kiba bun ki konstitwensi? Kawei na ki daw bah ka dei ka jingduk khamtam haba kiba bun ki la mad ïa ka jingshitom na ka daw jong ka jingkhang dam kaba la ïaid ar snem namar ka khlam COVID-19. Lehse ka sorkar kam don ki jingkheiñ jingdiah kiba thymmai ha kaba ïadei bad ka jingdon jong ki briew kiba duk. Tangba kaei kaba ngi tip ka long ba ka pisa ha ka por ilekshon 2023 ka la treikam bha ha kiba bun ki shnong ki thaw. Ki paidbah kim banse ban kner kat ïa kaba ki ïoh namar ki la don hapdeng ka jingsohsat. Lada ailad ïa ka jingduk jingkyrduh ba kan synshar beit, khlem pep ka jingpyndonkam pisa ha ki ilekshon ki ban wan kan nang kham jur. Ka dei ban don da ki lad kiba biang ban rah ïa ki nongshong shnong na ka jingduk.
Ngin ym pat lah ban ïa kdew lut hangne ïa ki mat bakongsan namar tang kiba sah na ki snem kiba la leit noh ruh ki dang bun, bad ki paidbah ki tip kham bha ïa kita. Ka por kan sa batai bad kan sa nang pynmih ïa kiwei pat ki mat kiba thymmai la ki dei kiba ktah shimet lane ïa ka jylla baroh kawei. Tangba ki don shibun ki jingkhmih lynti ym tang na ka liang synshar, hynrei wat na ka liang pyrshah ruh khnang ba ka synshar ka khadar kan kham beit bad kan kham wanrah jingmyntoi ïa ki nongshong shnong. Kam dei shuh ka por ban dang ïakren ïa ka kam thaw sorkar namar ka dei kaba la dep hadien ba la pynkha ïa ka kynhun synrop MDA 2.0. Nangne shakhmat, ngi dei ban peit noh sa ïa ki kam ki jam kiba ka sorkar ka dei ban leh bad lada kam leh ïa kaba dei ban leh, ka liang pyrshah ka dei ban takraiñ tyngeh.
