Shillong, Lber 08:
Ka Dr. M. Ampareen Lyngdoh kaba la shah pynbam smai kum ka Myntri jong ka Sorkar bathymmai kan khmih ïa ki tnad treikam ba kynthup ïa ka koit ka khiah, ka rep ka riang, Information & Public Relations (IPR) bad ka tnad aiñ.
“Nga dang shu ïoh jingtip ba ki kam ba la bynshet ha nga kum ka Myntri ki long ka koit ka khiah, ka rep ka riang, IPR bad ka tnad aiñ,” la ong ka Dr. Lyngdoh ha ka Sngi Balang.
Ka la ong ruh ba ha ryngkat ka jingkitkhlieh, ka kyrmen skhem ban pyndep bad trei hok ïa ka kam ba la bynshet ha ka.
Haba phai sha ka tnad ka koit ka khiah, ka Myntri ka la ong ba kane ka dei ka kabu ksiar ïa ka ban shimkhia mardor ïa ki jingdonkam ba kyrkieh ha ka liang ka koit ka khiah na bynta ki kynthei.
“Ngan peit bad shimkhia khamtam halor ka jingïap jong ki khyllung ba dang kha bad ki longkmie armet. Ngan ïaleh katba lah ban pynbha ïa ki jingdonkam ha ka koit ka khiah na bynta ki kynthei khamtam ha ki jaka nongkyndong,” ka la ong.
Haba ban jur ban don ka jingpynleit jingmut ba kyrpang na bynta ka jingsumar ïa ka jingpang bampong, ka Dr. Lyngdoh ka la ong ba kane ka jingpang ka don ha ka imlang-sahlang bad kan peit ba kane ka jingpang kan hiar da kaba pynbha ïa ki jingdonkam ha ki liang bapher-bapher.
Ka la ong ruh ba kan sa khmih bniah ïa ki jingduna jong ka MHIS bad ki skhim u Myntri Rangbahduh ba ïadei bad ka koit ka khiah.
“Nga kyrmen ba ngan trei hok ban kyntiew ïa kane ka tnad,” ka la ong.
Haba phai sha ka rep ka riang, ka Myntri ka la ong ba ka dei ka sien kaba nyngkong ïa ka ban bat ïa kane ka tnad treikam, hynrei wat la katta ruh, kan minot ban pyntreikam ïa ki jingdonkam kumjuh ki lad ki lynti na bynta ki nongrep ka Jylla.
Halor ka tnad IPR, ka la ong ba kawei na ki mat ba hakhmat eh ka long ka jingsahkut jong katto-katne ki jingdonkam kiba la dei ban ai sha ki nongthoh khubor la bun-bun snem mynta.
“Ha kito ki por ba nga dang long Myntri, nga la ïoh por khyndiat bad ka tnad IPR. Ha kato ka por ruh ngi la pyrkhat halor ka baibam, ki jaka sah bad ngan trei shitom ban peit ba ngi lah ban pynurlong ïa kine ki 2 tylli ki mat na bynta ki nongthoh khubor,” ka la ong.
Shuh shuh ka la bynrap ba kan nang pynjuh shuwa ïalade bad kiwei-kiwei ki kam bathymmai jong ka tnad IPR.
“Ka tnad aiñ ka dei ka tnad treikam kaba thymmai ïa nga. Ngan pynjuh shuwa ïalade bad kane ka tnad treikam bad peit kumno ngin pynbha ïa ki jingdonkam na bynta ka jingmyntoi jong ki nongshong shnong ha kylleng ka Jylla,” ka la ong.
