Gandhinagar, Lber:
Ka kynhun shipai Indian Coast Guard (ICG) ka la bat ïa ka lieng jong ki nong Iran bad kem ruh ïa ki san ngut ki nong Iran kiba shong ha kane ka lieng halor ka jingshah kynnoh ba ki la rah ïa u Heroin uba don ka jingkhia kaba 61 kilo uba la kot sha ka T. 425 klur na ki bynta rudnong jong ka Gujarat hajan Okha kaba don ha Kutch distrik, la ïathuh ki heh shipai ha ka lah sngi U Blei.
Ka jingthoh kaba la wan na ka Defence PRO ha ka miet jong ka lah sngi U Blei, hadien ba la ïoh jingtip halor kane ka jingjia na ka kynhun Anti Terrorist Squad (ATS) jong ka Gujarat, ka la ong ba la pyntreikam ïa ki shipapi jong ka Indian Coast Guard kiba la shah pyntreikam na ka bynta ka jingkhmih bniah ha ki bynta ka um duriaw ha kaba ki la shong ha ki jhad ICGS Meera Behn bad ICGS Abheek ha ka duriaw Arabian Sea.
“Ha ka por mynmiet, la ïohi ïa kawei ka liang kaba la ïaid ha ki bynta jong ki um duriaw ha ka jingjngai kaba 340 kilometre marjan ka bynta rudnong jong ka Okha. Haba la shah pynibor ha ki shipai kiba shong ha ka ICG, kane ka lieng ka la sdang ban phet bad phai noh na katei ka jaka. Hadien kane, kine ki jhad shipai ki la beh thong ïa kane ka lieng,” la ong ka jingthoh.
“Ïa kane ka lieng hadien ba la beh thong la shem ba ka dei ka lieng jong ki nong Iran kaba la don ryngkat bad san ngut ki briew kiba shong hapoh jong ka kiba dei ki nong Iran. Ha ka por ba la pynlong ïa ka jingtohkit da ka kynhun ICG, la lap ïa u drok ba 61 kilogram uba shongdor da T. 425 klur na ka lieng. Kane ka lieng bad kine ki briew kiba shong hapoh jong ka ki la shah rah bad shahkem ha kaba la ïalam sha Okha na ka bynta ban bteng shuh shuh ïa ka jingtohkit,” la ong ka jingthoh ba la pyllaitd da ki heh ka kynhun shipai.
