Mumbai, Lber:
U nongïalam jong ka seng Nationalist Congress Party (NCP) u Ajit Pawar hynnin ka sngi u la buh ka jingkyrpad ïa ka sorkar jylla ba ka dei ban mih shakhmat ha ka ban ai jingïarap bad ka jingkyrshan pisa na ka bynta ki nongrep.
Ha ka jingai jingkren sha ki lad pathai khubor, u Pawar u la ong, “ki nongrep jong ka Maharashtra ki la ïakynduh jingeh shibun ha kine ki lai sngi ba la leit na ka daw jong ka jingwan hap jong u slap u bym dei ban hap ha kane ka aïom. Ngin sa rah ïa kane ka mat ha kaba ïadei bad ka jingai ïa ka bailutksan na ka bynta ki nongrep hapoh ïingdorbar. Hynnin ka sngi, ka sorkar jylla hapoh ka jingïalam jong u Eknath Shinde ka la dei ba mih shakhmat na ka bynta ban ai jingïarap bad jingkyrshan pisa na ka bynta ki nongrep.”
“Ngi la ai ka shithi hapoh ïingdorbar ha kaba la batai bniah halor kane ka mat na ka bynta ban ai bailutksan sha ki nongrep, la ong u nongïalam jong ka liang pyrshah ka Maharashtra.”
“Ka la don ka jingïathuh lypa ha kaba ïadei bad ka jinghap jong u slap ha kine ki lai sngi ha kylleng ki jaka. Mynta ka sorkar ka la dei ban khmih bniah ha ka bynta ban pyntikna ban ai jingkyrshan pisa halor ki kam rep,” u la bynrap shuh shuh.
Ha ka 28 tarik, Rymphang, ka Maharashtra Legislative Council ka la sangeh ban ïakren hadien ba ki MLA jong ka liang pyrshah ki la wanrah ki jingkulmar ha ka por ba la ïakren halor ka mat jingdawa jong ki nongrep bad ka dor jong u piat.
U nongïalam jong ka liang pyrshah jong ka Legislative Council, u Ambadas Danve u la ong ba ki la don ki jingdawa ba la dei ban ïakren bad ïamir jingmut ha kaba ïadei bad mat halor ki nongrep bad ka sorkar hynrei ka sorkar kam shym leh kumta, namar kata ka Council ka la hap ban sangeh ha ka ban ïakren.
Ha kaba ïadei bad kane, ki MLA jong ka Nationalist Congress Party (NCP) ki la leit sha Maharashtra Vidhan Sabha ha kaba ki la rah ïa ki dor ba la buh halor u piat ha ka khlieh jong ki bad kieng ruh da u jingdeng ryndang ba la suh da u piat na ka bynta ban dawa ïa ka dor ban buh ryntih halor u piat.
