Shillong, Lber 08:
Hadien ba la dep lut ki kam kiba ïadei bad ka jingpynlong ïa ka ilekshon sha ka Ïingdorbar Thawaiñ kaba khatwei ka Jylla, ka Election Commission ka ri India ka la weng noh ïa ka jingpynjari ïa ki kyndon pyrkhing ilekshon lane Model Code of Conduct (MCC) ha kane ka Jylla.
Ka jingthep vote na ka bynta ka ilekshon sha ka Ïingdorbar Thawaiñ kaba khatwei ka Jylla ka la long ha 27 tarik Rymphang bad ka jingñiew vote ka la long ha ka 2 tarik Lber.
Wat lada la weng ïa ka jingpynjari ïa ka Model Code of Conduct (MCC), hynrei ha Meghalaya ka dang sah sa ka jingthep vote ha Sohïong konstitwensi kaba ym pat pynbna haduh mynta da ka Election Commission ka ri India.
La pynsangeh ïa ka jingthep vote ha Sohïong konstitwensi namar ka jingkhlad noh u kyrtong ka United Democratic Party (UDP) u Bah HDR Lyngdoh ha ka 20 tarik Rymphang, tang 7 sngi shwa ka jingthep vote.
Ka jingpynbna ba la weng noh ïa ka jingpynjari ïa ki kyndon pyrkhing ilekshon ka dei kaba la wan na ka Election Commission ka ri India lyngba u Senior Principal Secretary u Narendra N Butolia uba la pyntip sha baroh ki Chief Secretary bad ki Chief Electoral Officer jong ki Jylla kiba kynthup ïa ka Meghalaya, Nagaland, Tripura, kiba dang shu dep pynlong ïa ka ilekshon MLA bad sha ki Jylla kiba pynlong ïa ka ilekshon shiteng samoi ha Arunachal Pradesh, Jharkhand, Maharashtra, Tamil Nadu, bad West Bengal.
Ka jingpynjari ïa ki kyndon pyrkhing ilekshon ka la treikam naduh ba la pynbna ïa ka ilekshon ha ka 18 tarik Kyllalyngkot, 2023 haduh ban da dep lut ki kam kiba ïadei bad ka ilekshon khamtam ka jingpynbna da ki Returning Officer ïa ki briew kiba shahjied ha ka ilekshon.
