Shillong, Lber 08:
Ki bahaïing hasem ryngkat ka jingwan pynshngaiñ ki paralok parajor kiba najan bad najngai ki la ïoh ban leh burom khatduh ïa ka met kaba sah jong u Bah Enshon Lamare kaba la long mynta ka sngi ka 8 tarik Lber, 2023 ha phyllaw ïing sah jong utei u rangbah ha Mawlai Phudmuri hashwa ban leit rah sha u lum jingtep.
U Bah Enshon u dei u nongak phlim uba la kyntiew shisha ïa ki phlim Khasi naduh ba u ak kum u kpa ha ka phlim Kamon Ba Jwat, Hep, Onaatah, Ïewduh bad kumjuh ruh kum u nong ak biria ha ka Seng Biria U Khasi (SBUK).
Ha kane ka sngi la wan synranlang ruh da ki nongïashim bynta ha ki kam ak phlim Khasi bad la buh syntiew ruh da ka seng ki nongpynmih phlim Khasi ka Meghalaya Film Makers Association (MeFLiMA).
Hadien ba la dep leh burom ïa ka met kaba dang sah ha phyllaw ïing da ki bahaïing hasem ha kaba la ai jingkren da u khun shynrang uba nyngkong bad pule ïa ki khubor sngewlem na ki seng bapher bapher. Hadien kata la rah ïa ka met sha Ïingmane Katholik ha Mawlai ban leh burom khatduh da ka balang shwa ban leit rah ïa ka met sha u lum jingtep.
Haba ai jingkren haba pynlong ïa ka jingleh burom khatduh ha phyllaw ïing, u khun shynrang ba heh duh jong u Bah Enshon, u Bah Ulrich Warjri u la jaw ki ummat haba u kynmaw ïa la u jong u kpa ha ka por ba u dang im ha ka por ba u dang trei ha ophis mar shu wai trei u ju sngewtynnad ban leit khwai dohkha.
“Nga shait kynmaw haba i pa i sngew shitom ha ka met, hynrei lada don ba wan ïa wer ban leit khwai i sngew shait sngew khlaiñ lada ïoh bha ki dohkha” u la ong.
Ha kane ka sngi la ïoh ruh ka jingkren sngewlem na ka Seng Biria U Khasi kaba u Bah Enshon u bat kum u Vice-President bad na ka kur Lamare.
