New Delhi, Lber:
U Myntri Rangbahduh ka Britain, u Rishi Sunak ha ka Sngi Balang, u la pynbna ia ki jingthmu bad ki kyndon ba thymmai ba ka sorkar kan pyntreikam kum shi bynta ban tehlakam ia ka jingleit poi ki phetwir be-aiñ shapoh ka ri. Kumta ruh u Sunak ha katei ka sngi u la maham pyrshah ia kito ki phetwir kiba ju leit rung be-aiñ ha ka rukom bym dei bad u la ong ruh ba kito kiba leit ban rung be-aiñ shapoh u pud u sam jong ka ri Britain, kin duh ia ka jaka sah bad kumjuh ruh ka jingiada na ka sorkar.
Namarkata, la ong ba utei u Myntri Rangbahduh jong ka Britain ha kane ka kynti u la maham da kaba tyngeh pyrshah ia ki nong phetwir be-aiñ bad ong ba kito kiba wan rung sha Britain da ki rukom kiba long be-aiñ, kin duh ia ka jaka rieh tngen, kin duh ruh ia ka jingiada na ka sorkar bad ha kajuh ka por ruh kin duh lut wat ia ka hok long briew- man briew kaba ki dei ban ioh.
Shuh shuh ruh u la ong ba lada ioh jingtip halor ka jingdon jong kum kitei ki phetwir hapoh ka ri, ki bor pyniaid kin bat bad kin pynmih noh ia ki napoh ka ri tang da ki taiew hadien ka jingwan poi jongki sha Britain. Ia kitei ki phetwir kiba yn beh, lah ban pynpoi biang sha kato ka ri na kaba ki wan phet nyngkong lada ka ibit ban leh kumta.
Hynrei lada ym i long, yn phah pat ia ki sha kiwei ki ri kiba ju pdiang sngewbha ia kat ki phetwir kiba leit ban rung bad ban shong ban sah. Katba, ha kajuh ka por ruh, lada ka sorkar kan lap ia kum kitei ki phetwir kiba wan rung be-aiñ shapoh u pud- u sam jong ka ri, kin shah khang syndon baroh shi junom na ka jingleit jongki sha Britain.
Hapoh jong katei ka aiñ, la ong ba ki Myntri ka tnat kam poh iing, kin hap ban peit thuh ia ka jingrung jingmih jong ki phetwir hapoh ka ri bad kin hap ban ai jingkheiñ ia kito ki phetwir kiba leit ban rung be-aiñ shapoh u pud u sam jong ka ri.
Hynrei ia kaba mynta, ym lah ban ong la ka jingdon ki phetwir kiba poi be-aiñ ka jur ne duna ha Britain.
Shuh shuh ruh u Sunak u la ong ba ki don palat 45,000 ngut ki phetwir kiba wan poi na ki duriaw jong ka thaiñ Southeast ka England lyngba jong ki liengrit ha u snem ba la leit.
Na ka liang ki seng iada jaitbynriew bad kumjuh ruh na ki seng ka liang pyrshah, ki la pyrshah jur halor katei ka aiñ ba la wanrah da utei u Myntri Rangbahduh ba thymmai jong ka Britain (United Kingdom) bad ong ba katei ka aiñ ka long be-aiñ bad ka long ka jingleh ibeiñ ia ki jaitbynriew phetwir ki bym don jaka rieh bad ki bym ioh jingiada shuh ha kiwei pat ki ri.
Ka Britain ha u snem ba la leit ruh ka la sdang hi ban wanrah ia kum kine ki kyndon aiñ ban pyrkhing bad ban peit thuh ia ka jingrung- jingmih jong ki phetwir hapoh ka ri, hynrei katei ka jingthmu jong ka Sorkar ha u snem ba la leit ka la sah teng noh.
