Shillong, Lber 08:
U nongtem ba pawnam ka Jylla, Bah Lou Majaw ha ka Sngi Balang u la pyllait ïa ka kot poitri ba la ai kyrteng, ‘Brittle’, ba la thoh da ka Riniki Chakravarty Marweiñ ha Dylan’s Café, Shillong.
Katei ka kot ka dei ka thup ki jingthoh poitri halor ka jinglong khynnah bad ki bahaïing hasem, jingieid, jingduh noh bad jingkynmaw; bad kumno ba ka nongthoh ka la ïaleh pyrshah ïa ki jingtynjuh jong ka khlam.
La kha ïa ka Riniki Chakravarty Marweiñ ha Shillong bad ka la pyndep ïa kiba bun ki jingpule jong ka hangne. Ka la pynlut ïa kaba bun na ka por jong ka ha ka PR Industry ha Mumbai hashuwa ban leit sha Singapore ha u snem 2008.
Ka la pyndep ruh ïa ka ‘Master’s Degree’ ha ka tnad pule Mass Communication and Journalism.
“Nga la kum kynmaw ïa ki por barim ha ka por jong ka jingkhangdam. Ka jinglong khynnah jong nga bad ka por ba nga la pynlut ha India ki shat tawiar ha ka jingmut jingpyrkhat jong nga na ka por sha ka por. Nga la shong ïing kumba long lem kiwei pat bad nga khuslai na bynta kiba ieid bathoiñ jong nga. Ka la wan ka jingphieng, kumta nga hap ban wad lad ban pyllait ïa ki jingkhuslai jong nga. Dei ha kane ka por ba nga la sdang thoh ïa kane ka kot bad ngam shym la mutdur ba la lah ban pynmih syndon ïa ka,” ka la ong.
Ka Kong Marweiñ ka la bynrap, “Ka jingkynmaw ïa ki por ba la leit na bynta jong nga ka wanrah ïa ka jingsngew jan: Nga kwah ban pynkynmaw ïalade ïa ki briew bad ki jaka, bad ki mut kumno ïa nga.”
Hadien ka jingpyllait ïa ka kot, bud sa ka jingïakren hapdeng ka nongthoh bad ki nongïashim bynta halor ka poitri, ka put ka tem, jingai mynsiem, lem bad kiwei-kiwei ki sobjek.
U Bah Majaw ha kane ka sngi lem bad ka nongthoh ki la pule lang ïa katto-katne ki poitri na kane ka kot bad shim bynta ruh ban tem ïa katto-katne ki jingrwai ban pynsngewtynnad ïa ki nongïashim bynta kiba la ïalum lang ban kyrshan ïa kane ka jingpyllait kot.
Haba pynkut ïa ka jingïalang da kaba ai jingïaroh ïa ka nongthoh, u Bah Majaw u la ong, “Nga la thied ïa ka ‘Brittle’ ha u bnai ba la dep na kawei ka rynsan ‘e-commerce’. Nga la shoh jingieid bad baroh ki poitri jong ka; hynrei kawei na ki, ka ‘Sired Evening’ ka la khring shisha ïa nga. Ka don kaei-kaei ha ka poitri kaba tam lut ïa kiei-kiei baroh, kumba long ka put ka tem ka rwai ka siaw. Nga da sngewkmen shi kat dei eh ban ïadon lang ha kane ka sngi.”
Ïa ka kot ‘Brittle’ lah ban ïoh na baroh ki rynsan ‘e-commerce’ bad ha ki jaka die kot ba la jied ha kylleng ka ri.
