Washington, Lber:
Ka United States ha ka Sngi Ba-ar, ka la pynbna thymmai sa ia kawei ka song jingiarap kaba $26 Million na ka bynta ki phetwir Rohingya ha Bangladesh bad kumjuh ruh kiba don ha kiwei kiwei de ki thaiñ jong ka dew bah Asia.
Namar la ong ruh ba ki don kumba palat shi million ngut ki dkhot jong katei ka kynhun jaitbynriew Muslim Rohingya kiba im ha ki iing sher dara ha Bangladesh, bad kiba bun ruh ki la phet noh ha u snem 2017 hadien ba mih ka huri- hura ha Bangladesh ki la poi phetwir noh sha Myanmar.
Kumta la ong ba katei ka song jingiarap na ka United States ha kane ka kynti, kan iarap shibun eh ia kitei ki jaitbynriew phetwir kiba shu shang buhai shnong na kawei ka jaka sha kawei pat bad ki bym ju tikna ruh ban ioh ia ka bam ka dih bad ki jingdonkam kiba kum ki briew ki dei ban ioh ha ka jingim jongki ba man la ka sngi.
Da kane, lada kheiñ kyllum ia baroh ka pisa ba ka United States ka la lah ban pynmih bad ai naka bynta kitei ki phetwir ka la poi kumba $2.1 Billion eiei, naduh ka song jingiarap ba ka US ka la phah ha u snem 2017 tad haduh kane ka por ba mynta.
Ka United States ha katei ka Sngi Ba-ar, ka la ong ruh ba ka dang donkam sa kumba $876 Million eiei ban pyndap ia baroh ki jingdonkam jong kitei ki phetwir Rohingya kiba im hapoh Bangladesh, hadien ba ki la duh noh wat ia ki mar bam rashon ba ki ju dei ban ioh.
