Amritsar, Lber:
Ka jingpynlong ïa ki lai tylli ki jingïalang jong ka G20 ka la long ka bynta kaba hap ban ïakhun tyngeh na ka bynta ka sorkar Punjab ha kum kane ka por ba la mih ki khubor byrngem byrsit jong ka kynhun lehnoh Sikh for Justice (SFJ) ban pynthut ïa ka jingïalang jong ki 20 tylli ki ri jong ka pyrthei bad ban pynpaw pyrthei ïa ka Khalistan.
Ki arngut ki MP jong ka Congress kiba kynthup ïa u Gurjeet Singh Aujla bad u Jasbir Singh Gill bad uwei u MLA u Sukhpal Singh Khaira ki la shahkem ha ka sorkar Punjab hashwa halor ka jingthmu jong ki ban phah pynkynriah noh ïa ka jaka ban pynlong ïa ki jingïalang jong ka G 20 na Punjab.
Ha kaba ïadei bad ka jinglong jingman kum halor ka jingshah kurup jong ka jaka treikam jong ki pulit ka Ajnala da ki dkhot jong ka kynhun Waris Punjab De ha ka 20 tarik, Rymphang bad ka jingbyrngem jong ka kynhun lehnoh SFJ, hynrei ha kajuh ka por ki la pynibor pyrshah ïa ka sorkar Punjab halor ka jingbym i lah ban pynlong ïa ka jingïalang bad ka jingïakynduhlang jong ki ri ka pyrthei.
Kane ka la pynlong ïa u Myntri Rangbah jong ka Punjab u Bhagwant Mann ba un leit jngoh hi dala kijong ki khmat sha Amritsar, na ka bynta ka jingleit khmih bniah halor ki rukom pyntreikam ban wanrah jingshngaiñ, ki rukom pyntreikam ha kaba ïadei bad ka jingpynkhreh jong ki bor sorkar bad ban ai mynsiem bad ai jingmut ïa baroh ba kin lah ban don bynta ha ki rukom pyntreikam na ka bynta ban pynbeit ryntih ïa ki jingdonkam ha kine ki lai tylli ki jingïalang ki ban sa pynlong.
Ka kynhun Sikh For Justice (SFJ), ka dei ka kynhun kaba la shah ñiew beaiñ ha u snem 2019 hapoh ka jingtreikam jong ka Unlawful Activities (Prevention) Act (UAPA) halor ka jingpyrshah ïa ka India Khalistan Referendum bad leh ïa ki kam ba long pyrshah ïa ki kam saiñ pyrthei ha ka ri, halor ka jingleit sieh ïa ka lama Khalistan ha Makhu bad Amritsar -Verka Bypass bad byrngem ban pynthut ïa ki rukom ïaid jong ki rel da kaba khang ïa ki lynti rel ha Punjab ha ka 15 tarik, Lber bad ka 16 tarik, Lber ha kaba kane ka la wanrah ka jingshah kynthoh bad ka jingshah pynkhlemraiñ jong ka sorkar Punjab.
Kumba la ïoh jingtip, la ong ba ïa ka G20 Meeting halor ka pule-puthi bad ka jingïalang halor ka jingtrei jingktah la thmu ban pynlong ha ka 15 tarik haduh ka 17 tarik, Lber bad kawei pat ka jingïalang ka Y 20 yn sa pynlong ha ka 15 tarik, Lber ha Amritsar.
