Washington, Lber:
Ha kane ka kynti la ong ba ka United States ka la pynbeit ba naduh ka Sngi Thohdieng, kan weng noh ia ki kyndon pyrkhing ba la buh pyrshah ia ki nongleit nongwan na China haba iadei bad ka khlam Covid-19. Kane ka long ruh hadien ba ki katto katne ki ri jong ka pyrthei ki la weng noh ia kitei ki kyndon pyrkhing pyrshah ia ka China hadien ba ki la iohi ia ka jinglong jingman jong ka China ha kine ki sngi ba ka la jop shisha ia u khñiang jingpang Covid kumba ka la pynpaw ha kine ki khyndiat por ba la leit.
Ha ka taiew ba la dep, ka Japan ka la pynsangeh treikam noh ia ka aiñ ba kito kiba wan poi na China ki dei beit ban iaid lyngba ia ka ‘test’ tang mar ia poi hapoh ka ri.
Watla katta, la ong ba ka United States kan iai peit thuh ia ka jinglong- jingman jong ka khlam Covid-19 ha China bad kumjuh ruh ha kylleng ki ri jong ka pyrthei.
Ia katei ka rai jong ka United States ha kane ka por, la dep ban iathuh lypa da ki katto katne ki heh jong ka Washington ha ki katto katne sngi ba la leit.
