Shillong, Lber 09:
Hadien ba wanrah da ka aiñ rew lane ka ‘Ordinance’ ban pynduh ïa ka aiñ khalai kaba tip kum ka Meghalaya Regulation of Gaming Act, 2021, ka Sorkar Meghalaya Democratic Alliance (MDA)-II ka la wanrah sa da ka aiñ bapura lane ka Bill ban pynduh pyndam noh ïa kane ka aiñ.
Ïa kane la shim ha ka jingïalang kaba nyngkong eh jong Kynhun Myntri kaba la long ha ka sngi palei.
Haba kren sha ki lad pathai khubor hadien ka jingïalang ka Kynhun Myntri, u Myntri Rangbah Conrad K Sangma u la ong ba ïa kane ka Bill ka Sorkar kan rah sha ka Ïingdorbar Thawaiñ ha kane ka Dorbar Mang Tyngka ka ban wan.
Ka Kynhun Myntri ka la mynjur ruh ïa ka Contingency Fund of Meghalaya (Amendment), 2023 kaba la dep mynjur da ka Ordinance ha ka Sorkar kaba la dep.
Na ka liang, u Myntri Rangbah u la ïathuh ba ka Dorbar Tyngka ka Jylla kan sdang ha ka 20 tarik mynta u bnai bad kan dei mang tyngka kaba pura na ka bynta u snem 2023-2024.
Shuh shuh u Conrad u la ïathuh ba na ka liang ka Sorkar MDA-II ka la mynjur ban thung lai ngut ki nongaiktien kiba kynthup ïa ki lai ngut ki Myntri Sorkar; kita ka Kong Ampareen Lyngdoh, u Marcuise Marak bad u Bah Paul Lyngdoh.
