Shillong, Lber 09:
U Myntri Rangbah ka Jylla Conrad K Sangma u la pynkhamti da ka shuki Chairman jong ka Meghalaya State Planning Board (MSPB) ïa u Bah Metbah Lyngdoh uba dei u President ka United Democratic Party (UDP) bad MLA ka Mairang.
Kane ka jingpynkhamti da ka shuki Chairman ka Planning Board ka dei ruh namar ba ïa ka shuki Myntri ha ka Sorkar MDA-II la dep ban aiti sha kiwei ki ar ngut pat ki MLA ka UDP.
Lah ban pynkynmaw ba u Bat Metbah Lyngdoh uba dei u Lamphang barim ka Jylla, u la dep ban pynpaw ba u kloi ban pdiang ïa kano kano ka kam ka ban bynshet ha u.
Ha kawei pat ka liang u Conrad u la kubur ruh ba u la ïoh pdiang ïa ka shithi halor ka rai ba la shim da ka Bharatiya Janata Party (BJP) bad ka Hills State People’s Democratic Party (HSPDP) ban ïasam mar ar snem shiteng ïa ka shuki Myntri hapdeng ki MLA jong kitei ki seng.
“Hooid, ka BJP ka la phah shithi sha nga bad ka HSPDP ruh ha ka por ba ki ïakynduh nyngkong ïa nga, kane ka dei ka kyndon bad ka dei kaba la ïakren,” u la ong.
Haba phai sha ka UDP, u Conrad u la ong, “Kane ka dei ka kam pohïing jong ka UDP bad ki khlem pynpaw eiei ha nga halor ka jingïasam ïa ka shuki Myntri, hynrei haba phai sha ka HSPDP bad ka BJP, ki jingïakren ki la don hakhmat jong nga”.
Ka UDP ka la ïoh artylli ki shuki Myntri katba ka BJP bad ka HSPDP ki la ïoh mar kawei.
Haba kylli, u Myntri Rangbah u la ong, “Ynda la poi ka por, ngin sa ïakren halor kane ka kam. Hooid, ka jingïoh mihkhmat jong ka NPP ha ka kynhun Myntri ka lah ban nym long katkum ka jingkwah bad kumba phi ong, ngi la don bun nombor; hynrei kumba nga ong pat, ngi don shibun ki daw kaba ngi hap ban ïatreilang bad ngi hap ban ïapynbeit khnang ban ïahun lang baroh. Hynrei ngin sa nang bishar ïa ki lad ki lynti kiba don hadien habud”.
U Conrad u la kubur ba don bun ngut ki MLA na Ri-lum Garo bad ong “Hynrei kumba nga ong, ngi la ai 4 tylli ki shuki sha Ri-lum Garo bad 8 tylli ki shuki Myntri na Ri-lum Khasi bad Jaiñtia, hynrei ngi dang pyrshang ruh ban pynbiang tarajur. Ngi tip ba baroh ki kwah ban ïoh bynta bad mihkhmat ïa ki District ne ki thaiñ jong ki, hynrei ka long kaba eh bha namar ngi don da u pud ba hap bud”.
