Nongpoh, Lber 09:
Tangba kumba ar sngi hadien ba ki paidbah ki lap ïa ka khlieh jong uwei u rangbah uba la suba shah pynïap dusmon ha ki runar ha rud ka pung Umïam, ha ka sngi Balang la lap sa ïa ka tyrpeng kti kaba la per ha sla um bad ka met kaba khlem khlieh kaba la tep harud jong katei ka wah.
Utei u rangbah uba la suba shah pynïap dusmon ha ki ’riew thrang snam la tip kyrteng kum u Bah Omeka Myrthong na ka shnong Mawlaingut, East Khasi Hills District, bad u dei uba la don san ngut ki khun. La ïoh jingtip ruh ba utei u rangbah u dei uba ju ñiah kali kamai na Nongpoh sha Shillong.
Kane ka jingjia ba shyrkhei kumba la ïohi lyngba ki video kiba la saphriang ha ki rynsan ‘social media’, ka long ba ki ’riew thrang snam hadien ba ki la dep ban pynïap dusmon ïa utei u rangbah, ki la ot ruh ïa ka khlieh bad ki tyrpeng kti bad ban leit tep bad bret harud jong ki bynta ka pung Umïam kaba don marjan bad ka thanat pulit Umïam.
Ha ka sngi Palei, na ka liang ki pulit ka Crime Unit na nongbah Shillong ha ryngkat ki pulit ka Ri Bhoi lem bad ka jingdon ryngkat ki bahaïing hasem bad ki nongïalam shnong ka Mawlaingut ki la wan ban shimti noh ïa ki dkhot jong ka met na bynta ban leh eksamin bad pynlong ïa ka jingtohkit halor katei ka jingjia.
Hadien ba la pyndep ïa ka jingtohkit ha katei ka jaka, ïa ki bynta jong ka met la rah noh sha Nongpoh Civil Hospital na ka bynta ban leh ïa ka post mortem bad nangta la rah pat sha nongbah Shillong na ka bynta ban pynlong shuh shuh ïa kiwei-kiwei ki eksamin kiba bniah ban lap dien ïa ka rukom ïap jong utei u rangbah bad khamtam eh ban lap dien ïa ki runar kiba donkti ha katei ka kam kaba la pynpar ñiangkhriat ïa baroh ki paidbah.
Kumba la ïathuh da u Bah Saiñdur Nongbsap, Secretary jong ka shnong Mawlaingut, la ong ba kumba la ïathuh da ki bahaïing, utei u rangbah uba la shah pynïap dusmon, u la jah naduh ka 26 tarik u Rymphang. Hadien katei na ka liang ka shnong bad ki bahaïing ki la pynlong ïa ka jingwad shane shatai, hynrei ki khlem lapdien satia tad haduh ba la lap da ki paidbah na rud ka pung Umïam ha kine ki khyndiat sngi.
Shuh shuh utei u nongïalam shnong u la ong ruh ba utei u rangbah uba la shah pynïap dusmon u dei u bym don dak sniew satia ha shnong ha thaw bad u dei uba ju ai ïa ka jingïatreilang pura bad ki bor shnong.
Halor kane ka jingjia, na ka liang jong ka shnong Mawlaingut, ka pynrem jur ïa ki runar thrang snam kiba bym don shu ka jingïatip lem ban leh kat katei ka kam kaba ishyrkhei ban peit. Namarkata, ka kyntu jur ïa ki bor pulit ba kin shimkhia ban buddien bad ban kem mardor ïa ki runar bad ban ai ïa ka pynsaja kaba tyngeh khnang ba kum kine ki jingjia kim nym jia shuh hadien habud.
