Mukondi, Lber:
Haduh 36 ngut ki briew ki la khlad hashen na ka jingwan thombor kaba kynsan jong ki kynhun kieng atiar ha kawei ka shnong kaba don ha ki bynta ba shathie jong ka Democratic Republic of the Congo. Ia katei ka khubor la iathuh da ki shipai jong katei ka ri bad katei ka la jia ha ka por shiteng miet jong ka sngi Balang.
Katkum ki kyrwoh khubor ba la ioh na ki heh sorkar bad na ki nongialam jong ki seng treimon sngewbha, ki la ong ba ki ngutskhem ba ia katei ka kam thombor bad kam pyniap briew la leh da ki dkhot jong ka Allied Democratic Forces (ADF) kaba dei ka kynhun lehnoh kaba na Uganda bad kaba don ia ki ktem treikam jong ka ha u pud u sam jong ka DRC bad ruh ba katei ka seng ka la iasnohktilang bad ki dkhot jong ka ISIL (ISIS) na ka bynta ban pynurlong ia kane ka kam sniew.
Shuh shuh, ki khubor ki la iathuh ruh ba ha kaba nyngkong kitei ki dkhot jong ki seng lehnoh ki la leit ban thombor bad synreit kuli naphang ha ka shnong Mukondi kaba jngai tang 30km na Beni kaba don ha North Kivu province bad ruh katei ka thaiñ ka dei ruh kaba ju ki kam shah thombor na ka por sha ka por bad kaba lah shah pynhap hapoh ka jingpeit Bad jingpyniaid jong ki shipai.
Na ka liang jong u Lat ka North Kivu, u Carly Nzanzu Kasivita ha ka jingpathai khubor lyngba ka Twitter u la pyntip ba ki lah don haduh 36 ngut ki briew kiba la shah pyniap dusmon ha ki lehnoh bad kaba la jia ha ka por shiteng miet jong ka sngi Balang.
Watla u Kasivitauy la iathuh bad pynbna paidbah ba ka jingdon jong kiba khlad na katei ka jingshah thombor ka la long 36 ngut, hynrei na ka liang jong u Mumbere Limbadu Arsene uba dei uwei na ki nongialam jong kawei ka seng treimon sngewbha, u la pynbna ba ka jingdon jong kiba la iap na katei ka jingjia ki la kot sha ka 44 ngut.
Ki shipai ki la pynbna tang hadien katto katne kynta ba ki la pynlong ia ka jingleit khynra ia ki ktem jong kitei ki lehnoh bad ruh ha kaba la pyndonkam da ki liengsuiñ na ka bbynta ban therbom ia ki ktem jong ki bad hadien jong ka jingther bom, ki shipai ryngkew kin sa tur ban khynwit naphang.
Na ka liang jong ki bor sorkar ruh ki la ai ka jinglaitluid kaba paka ia ki shipai na ka bynta ban iakhun ia ki lehnoh bad ruh ban iada ia ki mynsiem jong ki riew lui lui.
