Imphal, Lber:
Ki bor sorkar ka tnat ‘Customs’ jong ka jylla Manipur ha ka 8 tarik mynta u bnai ki la pyntip ba ki la ïoh ban kurup ïa 1.92 kilo ki biskit ksiar ba shongdor haduh T.1.2 klur. Ha kane ka jingjia ki la ïoh ruh ban kem ïa u runar ba donkti ha kane ka beaiñ ban thmu pynïaid iew beaiñ ïa katei ka ksiar. Ki bor sorkar ki la kurup ruh ïa ka kali kaba u tei u runar u la pyndonkam ha katei ka sngi.
Kat kum ka jingïathuh jong ki bor sorkar, ki la ïathuh ba hadien ha ka jingïoh ïa ki jingtip na ki tnat syntiat na sha shilliang pud, ki bor sorkar ka Customs Preventive Forces jong ka Imphal branch ki la ïoh ban pynsangeh ïa kawei ka kali Maruti van ha ka shnong Pallel katba ka dang ïaid lyngba ka surok NH 102. Na katei ka kali, ki bor sorkar hadien ka jingkhynra ki la lap ïa kawei ka pla kaba la thep ïa 12 tylli ki biskit ksiar. Kat kum ka jingïathuh jong ki bor sorkar ki la ïathuh ruh ba katei ka ksiar kaba la ïoh kurup ha katei ka sngi ka don ïa 999.0 ka jingnylla (purity) bad khia haduh 1.92 kilo. Ki la pyntip ruh ba ïa katei ka ksiar la wan ban pynpoi beaiñ ha Manipur na Myanmar lyngba ka shnong Moreh, ha ryngkat ka jingthmu ban leit pynïaid ïew sha kiwei kiwei ki jylla jong ka ri India.
Ïa u runar, ka ksiar bad kumjuh ruh ïa ka kali la leit ban aiti noh sha ki bor pulit jong ka jylla Manipur na ka bynta ban pynlong ïa ki jingtohkit kiba dang sah.Na ka liang ki bor sorkar ki la ïathuh ruh ba ka tnat Custom ka la pynrung ruh da ka mokotduma hapoh ki kyndon jong ka Customs Act, 1962.
