U SUMAR SING SAWIAN
Ka ia smai ia spot jong ki myntri ioh shuki ha ki sorkar jong kane ka thaiñ shatei lam mihngi, ka la long kaba kyrkieh, kumba beh ka lyer langthari, ha kaba u Myntri Rangbah Duh ka Ri, u la hap ban iabeh, la kumba un sa duh lyer. Namar ym don satia kawei ruh ka seng hima sima, kan lah ban iohi ia ki briew ki ban shu biang, la hap ban iasoh lang bad kane katai.
Hangne ha Meghalaya, ka seng Congress ha Meghalaya, ka la kynshi ia ka seng Bharatiya Janata Party(BJP), na ka daw, ba ka BJP, ka leit iasohlang. U President jong ka National Peoples Party, u la aiti ha u Lat ka Meghalaya Phagu Chauhan, ia ki kyrteng jong ki 32ngut ki dkhot, da kaba kam, artad ban thaw ia ka sorkar synshar ha Meghalaya. U Sangma u la ong ruh ha ka liang jong u u don ban ioh ia ka BJP, nangta ka Hills State People’s Democratic Party (HSPDP) bad arngut ki dkhot shi met.
Hynrei kajuh ka por ka sorkar jong u Conrad ka la shah kynnoh, ba ka long ka sorkar kaba bam sap tam, ha ka Ri India baroh kawei. Kine namar kata ka daw ki jing-iakynduh bad ki jingiaknieh ban ia khwai ia kiwei kiwei ki ban iasnoh lang ha kane ka jingialeh ban wanrah ia ka sorkar kaba thymmai hapoh Meghalaya. Uwei na ki rangbah ka seng Congress ka Meghalaya, u Vincent Pala, u la kynnoh ba ka BJP, bad kiwei kiwei ki seng kiba iasynrop lang bad ka, ka long ban ia poi kurim tang namar ka daw, ban pyniabit pyniabiang ialade. Kumta ki iaid ryngkat ryngkat, kine ki jingiakdew kti kawei ka seng pyrshah ia kawei pat. Wat hapdeng ka jingpynsmai ia ki myntri thymmai jong kane ka sorkar kaba mynta.
Kumta wat hapdeng ka jingiasmai jong ki myntri ka sorkar thymmai, ki dang mih hi ki jingiakynnoh kawei ka seng pyrshah ia kawei pat. U Myntri Rangbah Duh u Narendra Modi, u la hap ban mareh kulai na kawei ka jylla sha kawei pat, ha kane ka thaiñ shatei lam mihngi, ban pynsmai ia ki sorkar thymmai bad ia ki dkhot ki jong ki.
Ka Meghalaya, naduh ba la kha iaka, la ioh mad ia shibun tylli ki jaid sorkar. Kawei kaba thiang, kawei kaba jew, kawei kaba sat sallaw, kawei kaba lah shiliang bad kumta ter ter, tip ha kane ka kynti kaba mynta, kan ioh ia ka sorkar kaba kumno.
Kawei kaban sah kynmaw, haduh ki pateng ki ban wan, kan long ba dei u myntri rangbah duh ka Ri, un ia don ryngkat ha kane ka jingpynsmai ia u myntri rangbah jong kane ka jylla baroh. Don tang laingut ki riew kynthei, kiba la bam smai, ha kane ka sorkar thymmai. Kine ki long ka kong Ampareen Lyngdoh, Miani D. Shira bad ka Shanta Mary Shylla.
Kumta kine ki long kiei kiei ki jingjia mynta, ha ka lympung jong ka sain hima sima jong ka jylla Meghalaya. Kawei kaba paw shynna, ka long ka jingduna jong ki riew kynthei ne ka longkmie. Kumta kan ktah shibun ba um khiew ja khiew jyntah jong ka jylla, u dang duna, bad ba u paid u dang khmih lynti ban ioh ia ka bam ka dih kaba dap kaba biang, hynrei kam shym long kumta, kumba la khmih lynti.
Ki jingiakynnoh bad jingiakdew kti ki long kiba bun, na baroh ki liang, ha kiba bun ki bynta. Kaba sah ka long sa tang ki jingkyrmen jong u paid ka jylla, ban ioh la kumno kumno ban bam ja bad thet ha ka ar sien jong ka sngi ha man la ki iing ki sem, ha ki paki ki dulan, ne ha kit rep ki skum.
