Shillong, Lber 09:
U nongïalam ka Congress Legislative Party (CLP) Bah RV Lyngdoh, u la ong ba ki ar tylli ki seng kiba shong ha liang pyrshah; ka Congress bad TMC kin rai ïano ban jied ïa u nongïalam ka liang pyrshah hadien ba la dep jied ïa u Lamphang ka ïingdorbar thawaiñ mynta ka sngi.
Haba ïakren bad u Bah Lyngdoh hadien ba la wai ka dorbar jied ïa u Lamphang ka ïingdorbar thawaiñ, u la ïathuh ban jied ïa u nongïalam ka liang pyrshah donkam ïa ka jingdon briew palat ïa ka 10 ngut ki MLA.
Kumta u la ïathuh ba haduh mynta kam pat don ka jingïakren bad ka VPP haba ki shong ha ka liang pyrshah ban ïa pynbeit lang ban jied ïa u Lamphang, hynrei katkum ka jingpynmih ha ki lad pathai khubor kim kwah ban don bad kano kano ka kynhun ha ka liang pyrshah.
“Ngin sa ïa shong pyrkhat hapdeng ka TMC bad ka Congress ïano ngin jied ïa u nongïalam ka liang pyrshah ban phah khnang ban ïoh jingmynjur na u Lamphang ka ïingdorbar thawaiñ namar baroh ar tylli ki seng ngi don mar san ngut ki MLA” u la ong.
Shuh shuh u la pynshai ba ka Congress bad ka TMC ka don la ka jong ka nongrim, hynrei na ka bynta ka jingmyntoi ka jaidbynriew bad ka jylla yn hap ban ïatreilang haba ki shong ha ka liang pyrshah.
Nalorkata, u Bah Lyngdoh u la pynpaw ka jinglyngngoh ba kumno ka BJP ka dang bteng ban ïatreilang bad ka NPP ha kane ka sorkar kaba mynta haba ka la dep kynnoh ba ka dei ka sorkar bamsap.
U la ong ruh ba naduh ba shah thombor ki jaidbynriew rit paid, ki khristan ha kiwei ki jylla, u Narendra Modi um ai kano kano ka jingkren ban pynrem ïa kiba thombor.
Ha kawei ka khubor la ïoh jingtip ba ka jingbym treh ka VPP ban ïasynrop lang ha ka liang pyrshah, ka la pynlong ïa ka TMC bad Congress ban jynjar haba jied ïa u nongïalam namar ki don mar san ngut na baroh ar tylli ki seng bad ki kwah ban long nongïalam.
