Shillong, Lber 09:
Ka Meghalaya High Court ha ka Sngi Palei ka la thalaiñ biang ïa ka sorkar jylla ha kaba ïadei bad ka jingjyllei ka jingtih bad jingkit be-aiñ ïa u dewïong bad mawshun bad ka la kynthoh ruh halor ka jingdon ki trok kiba kit palat pud.
Ïa kitei ki jingkynthoh, ka High Court ka la pynpaw ha ka por ba ka la bishar ïa ka mukotduma kaba ïadei bad ka jingdon ki trok kiba kit palat pud ha ka jylla.
“Kane ka kam ka la ïaid mynta la palat shi snem, hynrei ka sorkar jylla kam patiaw lane kam leh ïa kaba donkam pyrshah ïa ki kali kiba kit palat pud,” la ong ka High Court.
Ka ïingbishar ka la ong ba ka sorkar ka la dep ai jingthoh ban pyntip ba ki khyrdop ban peitngor (Check-Post) ki don 23 tylli ha baroh kawei ka jylla. Ha kine ki jaka ki la don lypa lane kin sa don ki kor ban thew ïa ki trok kiba kit palat pud.
“Ha baroh kawei ka jylla, ka jingtih dewïong be-aiñ ka dang bteng watla ka sorkar jylla ka la kular ba kan bat ïa ki hukum jong ki ïingbishar bad ki Tribunal. Hynrei wat ki hukum ba la dep pynmih da ka ïingbishar ban pyni ba ka paw ba ka sorkar ka ïadon bynta lang ha ka jingtih dewïong be-aiñ ki la shu nguid noh jar-jar,” la ong ka ïingbishar.
Ka la ong ruh ba wat lada ki nongshong shnong ki shah khynñiat ban tih dewïong be-aiñ namar ka jingbym don da kiwei pat ki lad ban kamai jakpoh, hynrei lada lah pat ban tem ïa ka jingkit dewïong be-aiñ ha baroh kawei ka jylla, kan ym don satia ka jingdawa dewïong bad namarkata, ka jingtih dewïong be-aiñ ruh kan hiar lane kan kut noh.
Ha kajuh ka rukom, ka ïingbishar ka la ong ba ka don ka jingtih pathar ïa u mawshun ha kaba ha kiba bun ki khep, ka sorkar ka phai da lyngkdong. Ki hukum ba dang shen na kane ka ïingbishar ki la pyni halor ka kyndon kaba thamula kaba shah ban tih lada lap ryngkhat ïa u mawshun. Ha ka kyrteng jong kane ka rukom tih, da ki hajar ton u mawshun la tih bad kit khlem da ïoh laisen shwa lane khlem da bud ïa kino kino ki kyndon.
Shuh shuh ka ïingbishar ka la kynthoh ruh halor ka jingkit maw shabar ka jylla bad ka jingtih shyiap na ki wah. “Kam don kano-kano ka jingartatien ba ki katto katne ngut ki nongshong shnong kiba don jingïadei bad ki kam saiñpyrthei ki pynïaid ïa kine ki kam bad ka sorkar jylla kam leh eiei,” la ong ka High Court.
“Ka sorkar kaba don ïa ka kamram ban ïada ïa ki jingdon jingem jong ka jylla, ka donkti pynban ha ka jingtuh jingthiem ïa kita,” ka la ong.
Nalorkata, ka la ong ba kam pat biang ban buh tang 23 tylli ki jaka ban thew ïa ki trok khamtam ba ka jylla ka dei ka lynti ïaid na ka bynta ki kali kiba leit sha Tripura, Mizoram bad Manipur bad kumjuh ruh sha Barak Valley jong ka Assam.
Kiba bun na kine ki surok kiba pynïasoh sha ki jaka ka thaiñ Shatei Lam Mihngi ki la sniew haduh katta katta, la ong ka High Court. Ha ka taïew ba la lah, ka ïingbishar ka la pynmih hukum ha kaba ïadei bad ka surok Jowai Bypass. Ka la ong ba ka jingsniew jong kane ka surok ka dei na ka daw jong ka jingïaid ki kali ba kit palat pud ïa kaba ka sorkar ka khlem pat leh eiei.
Namarkata, ka High Court ka la ong ba donkam ban pynkhreh ïa ki kyndon kiba kham khlaiñ bad kiba tyngeh na ka bynta ban peitngor bad ban teh lakam khnang ban khang ïa ka jingshah tuh shah thiem jong ki jingdon jingem ka jylla kiba la ai ei da ka mariang, bad kumjuh ruh ban pynneh ïa ki surok khamtam ba ki surok ki hap mad ïa u slap uba jur.
Ka High Court ka la bthah ïa u Secretary ka tnat Transport ban peit halor katei ka phang bad ban wanrah da ka skhim kumno ban teh lakam ïa ka jingdon ki kali kiba kit palat pud. U Secretary ka tnat Transport u lah ruh ban shim jingïarap na ka IIM Shillong ban pynkhreh ïa ka kpait saiñ kam halor kane. Hynrei ka High Court ka la ai por lai taïew ïa u Secretary ka tnat Transport ba un ai jingtip kiei ki kam bad ki sienjam ba u la shim.
