New Delhi, Lber:
Ki heh ba dei khmih jong ka patok ha Delhi ha ka sngi Balang ki la ai ïa ka jingpynshai ha kaba ïadei bad ka jingkynnoh jong ka seng AAP ba u Manish Sisodia u la shah pynsah lang ha ka along bad ki runar kiba shyrkhei.
Ki heh ba dei khmih ki la pynshai ba u Sisodia u don ha ka kamra kaba hapoh ka Central Jail Number 1 jong ka Tihar ha kaba la duna bha ki briew ba la set hapoh jong ka.
Ki la ong ba ym shym don ki runar ki ban sah lang bad u nongïalam jong ka seng AAP.
U MP jong ka seng AAP u Sanjay Singh bad u MLA Saurabh Bharadwaj u la pynshisha ha ka sngi Balang ba u Sisodia um shym la ïoh jingbit ban sah ha Vipassana Cell.
Ki la ong ruh ba u la shah pynbor ba un hap ban sah lang ha ka along bad ki runar kiba shyrkhei.
“Ka la don ka jingkyrpad na ka bynta u Manish Sisodia ba la dei ban buh ïa u ha Vipassana Cell jong ka patok bad kajuh la pdiang bad hukum da ka ïingbishar. Wat lada ka la don ka hukum kaba la wan na ka ïingbishar, u Sisodia u la shah buh ha ka along ha ryngkat ki runar kiba shyrkhei ha ka Jail Number 1. Ka sorkar kmie ka la dei ban ai ïa ka jubab,” la ong u Bharadwaj.
Ki heh kiba dei khmih ha Tihar ki la pynmih ïa ka jingthoh bad ong ba u Sisodia u la shah buh ha ka Ward kaba la kajong.
Ki la ong ba ïa kane ka rai la shim ban ai jingïada ïa une u riewsaiñ pyrthei. Ki la ong ba kane ka jaka ba la buh ïa u la don ki koidi kiba bha kiba leh ïa ki kam beaiñ barit baria ym ki runar kiba shyrkhei.
Ki la ong ba la ai la kajong ka kamra khnang ba un kham suk bad kham jai jai ki jingmut jingpyrkhat.
Ki heh ba dei khmih ki la ïathuh ha ki nongthoh khubor ba ïa baroh ki jingpynbeit ryntih la khmih bniah khnang ban ai ka jingïada bad ka jingshngaiñ ïa u Manish Sisodia, katkum ki kyndon jong ka Jail.
U Sisodia u la shahkem ha u bnai ba la lah halor ka jingshah kynnoh donkti ha ka kam bamsap kaba la mih na ka jingpyntreikam halor ka tnat Excise ha Delhi.
