Guwahati, Lber:
Ki bor sorkar ka tnat pulit jong ka jylla Assam ha ka 8 tarik mynta u bnai ki la pyntip ba haduh 5 ngut ki briew ki la shah kem na ka thaiñ Nagaon bad Morigaon district jong ka jylla Assam na ka daw jong ka jingdonkti jong ki ban pynbiang bad sam ïa ki SIM card sha ki dkhot ka tnat syntiat jong ka ri Pakistani. Kat kum ka jingïathuh jong ki bor pulit, ki la pyntip ba na kitei ki 5 ngut, ki la ïoh ruh ban kurup ïa bun tylli ki mobile, ki SIM Card bad kiwei kiwei ki kot ki sla ba donkam, kynthup ruh ïa kawei ka ‘handset’ kaba ju pyndonkam ban sam ïa ki jingtip halor ki kam pahara sha kiwei kiwei ki tnat trei kam bar ri.
Kat kum ka jingïathuh jong u nongaiktien ka tnat pulit Assam – Prasanta Bhuyan u la ïathuh ba ïa kitei ki 5 ngut ki runar la ïoh ban kem hadien ba ka tnat pulit jong ka jylla ka la leit ban pynlong ïa ki jingkhynra kiba jur ha ka miet jong ka sngi Ba-ar kaba la dep, hadien ka jingïoh ïa ki jingtip kiba bniah na ki tnat syntiat jong ka ri India bad kumjuh ruh na kiwei kiwei ki lad treikam.
U heh pulit u la ïathuh ba kat kum ka jingïoh jingtip jong ka tnat pulit ki don haduh kumba 10 ngut ki briew na kitei ki 2 tylli ki distrik kiba ju donkti ha ki kam beaiñ ban pynbiang bad sam ïa ki SIM Card sha ki dkhot ka tnat syntiat jong ka ri Pakistan. U la ïathuh ruh ba katei ka dei ka kam beaiñ kaba radbah kaba lah ban ktah ïa ka shong suk shong saiñ jong ka ri India. U la ïathuh ba ïa kitei ki 5 ngut la ïoh ban kem ha ka miet jong ka Sngi Ba-ar mynta ka taiew.
Ki 5 ngut ki runar kiba la shah kem ha katei ka miet ki kynthup ïa u Ashiqul Islam, Bodor Uddin, Mijanur Rahman bad Wahiduz Zaman na Nagaon; bad u Baharul Islam na Morigaon.
Ki tiar ki tar kiba ki bor pulit ki la ïoh ban kurup na ki ïing sah jong kitei ki 5 ngut kiba la shah kem bad na ki ïing sah jong ki 5 ngut kiwei pat kiba la lait phet ki kynthup ïa 18 tylli ki ‘mobile phone’, 136 tylli ki SIM card, kawei ka ‘fingerprint scanner’, kawei ka ‘high-tech CPU’ bad kiwei kiwei ki kot ki sla kiba kynthup ïa ki syrnot sngi kha, ki ‘passbook’ bad bun tylli ki dur ‘passport’.
Na ka liang u Bhuyan u la ïathuh shuh shuh ba ki bor pulit ki la ïoh ruh ban kurup ïa kawei ka mobile kaba la pynshai ba uwei napdeng jong kitei ki runar u la don ïa ka jingïadei kaba ïajan bad ki dkhot tnat syntiat jong ka ri Pakistan. U la ïathuh ba halor katei ka jingjia na ka liang ki bor sorkar ka IB ki la sdang ban pynlong ïa ki jingtohkit kiba bniah.
