Nongpoh, Lber 09:
Sa kawei ka jingshah pynïap kaba itriem ha Ri Bhoi District, la ong ba uwei pat u rangbah na ka shnong Pahammawleiñ 20 Mer uba la tip kyrteng kum u Elius Ryndong (70 snem) u la shah pynïap dusmon ha ki runar ki bym lah satia ban tip da kaba shah mait bad suba shah lynthem maw tad haduh ba ka bynta jong ka khlieh ka la pra bad dambit ha khyndew.
Kumba la ïoh lum jingtip, la ïathuh ba utei u ’riew tymmen u dei uba smat ban rep ban riang bad uba don ïa ka lyngkha rep lajong kaba don marjan bad ka madan ïalehkai jong ka shnong 20 Mer Pahammawleiñ.
La ong ba ïa ka met ïap jong utei u rangbah kaba la thiah lyngktar la lap da ki briew shnong na katei hi ka lyngkha rep ka jong u.
Katkum ki jingtip ba ïoh na ki bahaïing, la ong ba utei u ’tiew tymmen u la mih na la ïing sah ha ka por kumba 7 baje ha ka step sngi Palei ban leit sha lyngkha, hynrei na ka liang ki bahaïing ki la ïoh jingtip haduh ka por janmiet; kata ha ka por kumba 5:30 eiei ba la don ki briew shnong kiba la lap ïa ka metïap jong utei u ’riew tymmen.
Na ka liang ki bor pulit hadien ka jingïoh jingtip halor katei ka jingjia, ki la hiar wut-wut sha katei ka jaka ban leit shimti ïa ka metïap bad ban wanrah noh sha Nongpoh Civil Hospital na ka bynta ban pyndep ïa ka post mortem.
Halor kane ka jingjia, na ka liang ki pulit ka Ri Bhoi ki dang pynlong ïa ka jingtohkit bad ban thwet, bad lapdien ïa ki ’riew thrang snam kiba donkti ha kane ka kam runar kaba la pynpar ñiangkhriat ïa ki paidbah nongshong shnong bad ka thaiñ hi baroh kawei.
