Shillong, Lber 09:
U Lamphang ka Ïingdorbar Thawaiñ kaba khatwei ka Jylla, u Thomas A Sangma u la ong ba u dang pan jingmut na ki ’riew tip aiñ ban ai jingmut lang haba ïadei bad ka jingdonkam ban ïoh ïa u nongïalam ka Liang Pyrshah, namar katkum ka kyndon, donkam ban don 10 ngut ki MLA na kawei ka seng saiñ pyrthei ban kam ïa kane ka kyrdan ha Ïingdorbar Thawaiñ ka Jylla.
U Thomas, uba dang shu shahjied kum u Lamphang, u la ong ba kumba ka long mynta, ki seng saiñ pyrthei kiba don sha ka Liang Pyrshah ruh kim pat phah kano kano ka jingthoh haba ïadei bad kane.
Kumta u la ong ba u dang pan ka jingai jingmut na ki ’riew tip aiñ halor kane ka bynta hashwa ban ai kano kano ka rai.
Kum ban shu kdew, ki lai tylli ki seng saiñ pyrthei kiba kynthup ïa ka Congress, TMC bad VPP kiba don sha ka Liang Pyrshah ki dei kiba don ki MLA tang hapoh 6 ngut; kita ka Congress ka don 5 ngut ki MLA, ka TMC ka don 5 ngut bad ka VPP ka don 4 ngut ki MLA.
Haba kylli la ka shah ka kyndon ba ki seng saiñ pyrthei kin wanlang hajuh ban thaw ïa ka kawei ka kynhun (alliance) ban kam ïa ka kyrdan nongïalam Liang Pyrshah, u Lamphang u la ong ba lada ka don ka kynhun kum kata, un sa peit bniah ha ryngkat ka jingai jingmut kaba ïohpdiang na ki riewtip aiñ.
Lada kine ki seng baroh lai tylli ki ïasoh lang ban thaw da ka kynhun Liang Pyrshah, ka jingdon ki MLA baroh kan long 14 ngut.
