Shillong, Lber 10:
U Welkin Stone Shadap uba dang 20 snem ka rta, u la ïoh ïa ka syrnod na ka Asia Book of Records hadien ba u la lah ban ïaid kjat haduh 101.54 kilometre hapoh 19 kynta tang shi sngi.
U Welkin Stone Shadap u dei uba shong ba sah ha Mawlai Mawïongrim bad u dei u khun jong u Bah GR Khongjee bad Kong B Shadap, bad u dang pule B.Sc 6-semestar ha Synod College, Shillong.
Kane ka jingïaid kjat u Welkin khlem sangeh ka dei ha ka 26 tarik Kyllalyngkot 2023 kaba u la sdang ban mih na la ïing ha ka por 3 baje mynstep ban ïaid marwei shaduh Sohryngkham lyngba ka surok bah bad wanphai biang sha Mawïongrim ban pyndep haduh 101 kilometer haduh Saiden, Nongpoh.
Hadien ba u la pyndep ïa ka jingïaid kjat u la dep phah ruh ïa ki jingdonkam katkum ka juk stad mynta sha ki nongpynïaid ka Asian Book of Record bad mynta ka sngi ka 10 tarik Lber 2023 u la ïoh ïa ka syrnod kaba la phah ryngkat bad ka takma.
Haba ïakren bad u Welkin Shadap u la ïathuh ba naduh por ba dangrit haba u leit sha ka klas skul pynpaw man ka Sngi U Blei u ïaid da ka kjat na ïingsah haduh 5km haba leit bad 5km haba wanphai sha ïing, kane ka la pynlong ïa u ban angnud ban ïoh ban buh sah jingkynmaw ha ka jingim lajong.
U la ïathuh ba katkum kane ka juk stad u la wad lyngba ki internet bad la lap ba ka don ka Asian Book of Records kaba lah ban pynshisha haba u lah ban ïaid kjat bun kynta bad hadien ba u la pyndep shwa ïa ka Indian Book of Records u la ïoh ban pyndep syndon ïa ka Asian book of Records.
Nalor kata, u don ruh ka jingangnud ban pyndep sa ïa ka World Record ban ïaid kjat palat 200 km hapoh shi sngi bad ïa kane un dang pyrshang ha ki por ban wan.
