Guwahati, Lber:
Hadien ka jinglait jong ka lyer (gas) na kawei ka pung ring umphniang, ki nongshong shnong jong ka thaiñ Baghjan, Tinsukia district ha ka 9 tarik mynta u bnai ki la leit ban pynrung da ka FIR pyrshah ïa ka Oil India Ltd (OIL). Nalor ki nongshong shnong la ïathuh ba ki la don ruh kiwei kiwei ki seng trei kam kiba la leit ban ujor da ka FIR ha ki bor pulit ka thaiñ Tinsukia.
Ka jingjia lait shabar jong ka lyer na katei ka pung ring umphniang ka la jia ha ka sngi Balang ba la dep ba katei ka la wanrah ruh ïa ka jingsyier ha ki nongshong shnong jong ka thaiñ.
Kat kum ka jingïathuh jong u wei u ophisar ka OIL, u la pyntip ba ka lyer na katei ka pung ring umphniang ka la lait shabar na ka daw jong ka jingdon katto katne ki jingthur ha ki kot trei kam. Na ka liang u PRO ka OIL – Bhairab Bhuyan u la pyntip ba ka lyer ka la lait ha ka por ba la sdang ban pyrshang ring umphniang na katei ka pung umphniang kaba don ha ka shnong Baghjan. U la ïathuh ruh ba hadien katei ka jingjia, na ka liang ki briew jong ka OIL ki la lah ban pynsangeh ïa ka jinglait jong ka lyer hadien ba ki la tap noh noh ïa katei ka pung.
