Mawkyrwat, Lber 10:
Ka ding kaba klang bha ha ka miet shiteng synñia ka la bam duh ïa san tylli ki dukan ha ka shnong Sakwang, South West Khasi Hills District bad ka jingjulor baroh ki la kot sha ki phew lak tyngka.
Katkum ki tyllong khubor ba la ïoh lum, la ïathuh ba katei ka jingjia ka la jia ha ka miet shiteng synñia jong ka 10 tarik mynta u bnai ha ka por kumba 12:30 eiei ha kaba ka ding ka la ïoh ban bam shngiam ïa kitei ki dukan.
Dei tad lyngba ka jingwan poi kloi jong ki kali pynlip ding na Mawkyrwat sa lah ban tem noh ïa ka ding hashuwa ba kan pur sa sha kiwei pat ki dukan kiba don marjan.
Kitei ki dukan kiba la shah bam ha ka ding ki kynthup ïa 2 tylli ki dukan sha bad 3 tylli ki dukan die marbam kiba dei trai da ka Kong Ridalin Lyngkhoi, Kong Ïawanhun Ramsiej, Kong Pimulin Wartde, Kong Drip Wartde bad Kong Bonlina Kharjahrin.
Shuh shuh ki tyllong khubor ki ïathuh ba ïa ka daw jong ka jingpluh kitei ki dukan haduh mynta ym pat lah ban tip bad katei ka jaka ka dei ka jaka ïew.
Haba ïakren ba u Myntri ka shnong Sakwang, u la ïathuh ba ka jinglut baroh ka la kot sha ki phew lak tyngka.
