Kochi, Lber:
Ka la ïaid mynta la kumba shi taïew naduh ba la jia ka jingpluh ding kaba shyrkhei ha ka jaka bret ñiut ha Brahamapuram, hynrei ka jingbitar jong ki nongshong shnong jong ka Kochi ka la nang jur. Ki nongshong shnong jong kane ka thaiñ ki la ud shitom bad shah ktah ha ka liang ka koit ka khiah jong ki bad ki skul ki la khang lut.
Kane ka la long na ka jingjur jong ka lyer jaboh kaba la ktah jur ïa ki bynta ba bun jong ka Kochi kaba la jia shi taïew hadien ba la jia ka jingpluh ding ha ka jaka bret ñiut ha Brahmapuram. Ka jinglong jingman jong ka lyer ha Kerala ruh ka la shah ktah jur na ka daw jong ka lyer bih kaba la her bad beh sha kylleng kaba la mih na katei ka jaka bret ñiut.
Ïa ka ding ha katei ka jaka la lah ban tem bad pyllip noh da ka jingïarap jong ka tnat shipai duriaw bad ki shipai suiñ, hynrei ka jinglynguh jong ka tdem na katei ka jaka bret ñiut ka dang bteng haduh mynta mynne.
Ki nongshong shnong ki la ud ba kim lah ban ring bad pynhiar mynsiem naba ka lyer kaba rung wat hapoh ïing jong ki ka sma jri ne plastik thang, kane ka la pynshitom ïa ki ha ka ban ring bad pynhiar mynsiem.
Ha ka por ba la don ki nongshong shnong kiba la ud ba ki shem shitom ha ka ban ring bad pynhiar mynsiem bad ba don ka jingtyrkhong ha ki khmat jong ki, ki heh sorkar ha katei ka thaiñ kim shym la leh ei ei hynrei ki la shu hukum ïa ki ba kin shong hapoh ïing bad ba kin pyndonkam da ki N-95 Mask haba ki mih shabar.
Ki heh sorkar ha katei ka thaiñ ki la pynbna ba ki skul kin ïai bteng ban khang na ka daw jong kane ka jinglong jingman. Ki bor sorkar ki la pyntreikam ïa ki kynhun pyllip ding ha man ki jaka na ka daw jong ka jingkynton ki jaboh ba la bret ha katei ka jaka bret ñiut bad ki la kynshait um ha katei ka jaka khnang ban pynjah ïa ka lyer jaboh kaba mih na kane ka jaka.
Ka jaka bret ñiut ha Brahamapuram ka don ka jingheh kaba 110 akar. Ka sorkar ka la ong ba ïa ka jinglong jingman la lah ban tem bad ym shym buh jingma shuh hynrei ka la bthah ïa ki briew kiba don jingshitom ha ka ban ring bad pynhiar mynsiem, ki tymmen ki kro bad ki khynnah ba ki la dei ban sumar bha.
Kumba ka la jia, la ïathuh ba ka jaka bret ñiut kaba don ha Brahamapuram ka la pluh ha ka 2 tarik, Lber bad kane ka la pynjaboh bad pynkylla bih ïa ka lyer ha ka nongbah jong ka Kochi bad ki thaiñ bamarjan ruh ki la shah ktah lang ha kane ka tdem kaba la lynguh.
Ha kaba ïadei bad kane, ka sorkar, ka la ong ba na kine ki thaiñ bamarjan ym pat ïoh khubor ei ei ban don ki briew kiba shah ktah na ka lyer jaboh.
Haba la buh bad pynap ïa ki kynhun pyllip ding da ka jingïarap jong ki shipai duriaw bad ki shipai suiñ la lah ban pyllip ïa ka jingklang jong ka ding. Kumba la shem, la ong ba ka ding ka la lip hynrei ki ñiut kiba don ha katei ka jaka ki dang ing bad pynmih ïa ka tdem jaboh wat lada kam don shuh ka jingmeh jong ki thylliej ding.
Katkum ka jingïathuh jong ki heh ba dei khmih jong ka tnat Municipality, la ong ba kum kine ki jingjia ki ju jia man u snem ha kum kine ki por namar artad ba jur ka jingshit. Hynrei ka jingsma jong ki tdem plastik ne sma jri ka la pynlong ïa kine ki nongshong shnong ba kin ym lah ban ring mynsiem.
U nongïalam jong ka liang pyrshah ha Kerala Assembly, u VD Satheesan, ha ka sngi Balang jong ka taïew u la buh ka jingkyrpad na ka sorkar jylla ba ka la dei ban pynbna ban don ka jingpyntreikam kaba kyrkieh ha kaba ïadei bad ka koit ka khiah jong ki briew kiba don ha ka thaiñ ba don ka jaka bret ñiut, ha kaba la ong ba kane ka tdem kan sa poi sa sha kiwei pat ki bynta ne ki distrik hapoh ka jylla.
