Shillong, Lber 10:
U Bah Paul Lyngdoh uba dei u MLA ka United Democratic Party (UDP) na West Shillong konstitwensi bad Myntri ka tnad Social Welfare u la ong ba ka jingkiew jong ki kam die met bad ka HIV bad AIDS hapoh ka Jylla ka dei kaei-kaei kaba hap ban phaikhmat.
Haba kylli halor ka jingkiew ki kam die met hapoh nongbah Shillong khamtam ha ka thaiñ Khyndailad bad ka jingkiew ka HIV bad AIDS hapoh ka Jylla, u Bah Paul u la ong ba lada khmih bad peitngor ha kane ka bynta, ka long kaba donkam bha ban phaikhmat khnang ban lah weng ïa kane ka jingeh kaba don.
Haba kren sha ki katto-katne ngut ki lad pathai khubor, u Bah Paul u la ong ba ym don mano-mano kiba kwah satia ban trei da ka kam die met, hynrei ka dei da ka jingbym banse kaba la pynlong ïa ki ban leh ïa katei ka kam tang ban ïoh ka kamai ban pyndap ïalade bad ka ïing ka sem jong ki.
Haba kylli halor ka jingpulom noh bad ka jingbym ïasngewthuh jingmut jong ki seng ’riewlum ban thaw ïa ka Sorkar Synrop, na ka liang u Bah Paul u la ong ba ka jingpulom ban thaw ïa ka Sorkar Synrop ka dei namarba ka jingïalong kawei kaba ju don mynshuwa ka kloi ban ïapait ïapra bad u la ong ba ki don kiei-kiei ki jingsneng kiba kum ka Jaidbynriew ka dei ban bud, hynrei ki don ruh pat ki jingsneng kiba ka la dep bud lypa.
“Nga tharai ngi dei ban ïaleh ban ïatreilang ban buh ïa ka thong bad ban peit biang sa shisien ban pynïoh bor biang ïa ki seng ’riewlum,” la ong u Bah Paul.
