I. R. Dkhar
Ka jingthaw ïa ka Sorkar da ka NPP kaba la ïasynrop lang da kiwei ki seng kum ka UDP, HSPDP, PDF, BJP bad ki Nongmihkhmat khlem seng ne Independent ka la poi sha ka 45ngut ha ka ïing kaba 59 ngut. Kata ka mut na ka 59ngut, tang 14ngut ki pynlong ïa ka Liang Pyrshah ne Opposition Party. Kine ki kynthup ïa 5 ngut ki TMC, 5ngut Congress bad 4ngut ki VPP. Ha ka Sorkar, dei ban don barabor kaba synshar ne ka Ruling Party bad ka liang Pyrshah ne ka Opposition Party. Khlem ka Opposition Party, ka Ruling Party, ka lah ban leh katba mon, ka rai katba mon, ka pynmih rule katba mon, ka pynlut pisa katba mon bad kaba ïalam sha ka bamsap kaba jur. Namarkata, donkam ïa ka Opposition Party kaba khlaiñ bha khnang ba ka Ruling Party kam lah ban leh katba mon.
Hangne ha Meghalaya jong ngi, ka long kaba pher bha ym kumba ngi khmih lynti ba kawei na ki party kin ïoh ïa ka jingbunpaid. Ka daw ka dei na ki jingmih ki party tit, kumba nga la dep thoh ha ki kotkhubor mynshuwa. Dei kine ki party tit kiba pynsniew ïa ki party kiban ïaleh ïa ka elekshon. Kim ïadei jingmut bad kim don tang kawei ka jingthmu ne aim bad objective na ka bynta ka jingwan rah ïa ka jingsynshar kaba bha ha ka Jylla. Ha kane ka Election kaba la dep kata ka 27.2.2023, ka long kaba kynrum kynram bha. Ym don kano kano ka Party kaba ïoh ïa ka jingbunpaid (Majority). Kumta ka NPP kaba la ïoh haduh 26 ngut, ka kloi ban tan ia kiwei pat ki party ban rung sha ka sem jong ka. Hooid, ka la don ka jingpyrshang jong ki Party Riewlum ban thaw Sorkar, hynrei kim lah leh eiei namar ki duna briew. Kawei ruh ka long ba kim don ka jingïa-sngewthuh jingmut bad ka thong ban ïoh ka jingsynshar da u Chief Minister Khasi. Kane ka long thik, kaba nga kynmaw ïa ka jingkren jong uwei u Rangbah (bam kwai ha dwar U Blei), “u Khasi u long u jaitbynriew uba ba da synshar da kiwei ka biang, hynrei ban synshar hi um lah”. Ka long thik shisha kumta, naduh ba la ïoh Hill State ha u snem 1972, la shah synshar beit da kiwei ki jait briew, lait tang shipor haba la synshar da u Bah Brington Buhai Lyngdoh bad Bah E.K. Mawlong.
Kane ka Sorkar ba la ïalam da ka NPP kan neh beit haduh bakut ka samoi ne ka term. Ka don ka National Outlook. Ka don ka jingkyrshan bad jingïadei bad ka Sorkar na Delhi – ka BJP. Ngam tip lada ka dei ban ïaleh ïa ka jinglong ritpaid jong ngi ki Khasi – Jaiñtia bad Garo ne Minority – ha ka ktien ka thylliej, ha ka riam ka beit, ha ka niam ka rukom ne jingmane blei laitluid bad kiwei kiwei kiba ktah ia ngi ki minority. Namarkata, nga ong biang ba ka opposition party ka long kaba donkam haduh katta katta. Ai ba kitei ki party, kum ka Congress, VPP, TMC kin ïatylli lang ban pyrshah ïa kano kano ka jingleh tam jong kane ka Sorkar ha kano kano ka bynta.
Ngi ki paidbah ngi kwah ïa ka jingkylla, la ha ka jingroi jingsan, ha ki lynti synkien, ha ki jingnang jingstad, ban don ki Medical College la ka jong, ki doctor kiba biang, ki karkhana pynmih kam pynmih jam kai ki samla, ban bat ïa ka jinglong ka Jylla kum ka Education Hub ha North East bad bun ki jingroi jingsan kiba ym lah ban batai, ngi donkam. Ym dei ba ka Jylla jong ngi kan sah kumjuh kumba long baroh shikatta. Ngi khmih lynti ïa kita.Namarkata ka Opposition Party, nga ong biang sa shisien, ka long kaba donkam haduh katta katta ba ka Sorkar ka dei ban pyntreikam shisha da kaba khuid, da ka jingtipbriew tipblei bad ban lait na ka bamsap ha kino kino ki skhim ne ki projek.
