Khliehriat, Lber 10:
Haduh 13 ngut ki briew kiba kynthup ïa lai ngut ki nongtrei MeECL ki la shah kem ha ki pulit jong ka East Jaiñtia Hills District halor ka jingsuba donkti ban thang ïa kawei ka ïing ha ka shnong Rymbai.
Ka khubor pulit ka ïathuh ba ha ka 8 tarik Lber ha ka por 10:45 mynmiet ka la don ka jingshah thang ïing ha ka shnong Rymbai ha Rymbai Ïawpynsin ha ka kynhun jong ki runar. La ïathuh ba kane ka ïing ka dei jong u Waheh Shnong barim ka Rymbai.
Ha kane ka jingjia ki paidbah nongshong shnong ki la ïoh bat ïa uwei u briew uba kyrteng u Deishim O Lamurong (26 snem) na Rymbai Shynrang Sakhaiñ ha ka por ba u dang thang ïa kane ka ïing, katba kiwei pat ki paralok jong u ki la ïoh ban phet krad namar ka jingdum.
Shuh shuh uwei pat ïa uba la tip kum u Heisalon Dkhar uba trei ha MeECL Control Room ïa uba suba donkti ban ïasylla lang ha kane ka kam, u la shah kem. Nalor jong une, la don ruh sa arngut kiwei pat ki nongtrei ka MeECL kiba la shah kem halor ka jingkynnoh ba ki la donkti ban pynlip ïa ka bording ha Rymbai hashwa ba ki runar kin leit thang ïa ka ïing u Waheh Shnong barim.
Ha kaba ïadei bad kane ka jingjia thang ïing ki pulit ki la pynrung da ka jingujor ha thanat Khliehriat (Case No. 18(3)2023 u/s 120B/307/427 /436/506/34 IPC)
Ki pulit haba tohkit shuh shuh ïa kane ka jingjia, la lap ba kane ka kam thang ïing la sylla ka kynhun jong kiba bun ngut ki briew bad ki pulit ki la thwet ïa kine ki runar. Haduh ba la thoh ïa ka khubor kiba shah kem ki don haduh 13 ngut.
Nalor u Heisalon Dkhar (33 snem), ki pulit ki la ïoh kem ruh sa ar ngut kiwei pat ki nongtrei ka MeECL kiba kynthup ïa u Elius Wanniang (40 snem) uba na ka shnong Mawkyrwat bad u Rishotlang Bareh (31 snem) na Khimmusniang, Jowai.
La kynnoh ba kine ki nongtrei MeECL ki dei kiba ïarap ïa ki runar ban pynlip ïa ka bording ha Rymbai.
Kiwei pat kiba shah kem ki dei u Bakstar Dkhar (32 snem), u Cherishme Dkhar (23 snem), Eborlang Nongtdu (35 snem), Emerson Dkhar (25 snem), Roilang Dkhar (36 snem), Henry Shangpung (32 snem) bad u Thynda Lyngdoh (36 snem). Baroh kine kidei na ka shnong Rymbai Synrang Sakhain.
Ha ka Sngi Thohdieng, ki pulit ki la ïoh kem sa ïa arngut kiwei pat ïa kiba la tip kyrteng kum u Kletin Suchiang (27 snem) bad u November Dkhar (24 snem) na ka shnong Rymbai.
