New Delhi, Lber:
Ki shipai jong ka tnat Border Security Force (BSF) ki la kem ïa uwei u nong Pakistan hajan u International Border ha Ferozpur Sector jong ka Punjab ha ka sngi Palei. Kane ka dei ka sien kaba lai kaba kum kine ki jingjia ki wan jia tang ha ki lai sngi. Ïa une uba la shahkem la tip ba u dei u nongshong shnong jong ka Khyber distrik kaba don ha Pakistan.
Ha ka por shiteng synñia jong ka 9 bad ka 10 tarik, Lber, une u nongwan rungtuh u la ïaid lyngba u International Border bad rung ha ki bynta jong ka ri ha Tirath Border Post. Ki shipai BSF ki la kem noh ïa u bad la pynlong ïa ka jingtohkit bniah. Kumba la ïoh jingtip, la ong ba ha ka por ba la kylli jingkylli ïa u, u la phla ba u dei u nongshong shnong jong ka Khyber distrik, kaba don ha Pakistan.
Ka jingpyntreikam ha kaba ïadei bad ka jingïoh jingtip shuh shuh halor jong u ka dang ïai bteng. Hashwa, uwei u nongshong shnong jong ka Bangladesh u la shahkem ha ka kynhun shipai BSF katba u dang pyrshang ban ïaid lyngba ka International Border bad rung ha India. Une u briew u la shahkem ha ka por shiteng synñia kata ha ka 8 bad ka 9 tarik, Lber ha ka thaiñ ba don ka jaka treikam jong ki shipai ha Amritsar Sector jong ka Punjab, la ïathuh u heh jong ka tnat shipai BSF.
Ha kawei pat ka khubor, la ïathuh ba uwei u nong Pakistan u la shahkem hashwa ban poi ha ki bynta ba la ker pur hajan ka jaka treikam jong ki shipai BSF ha khappud jong ka ‘Nikka’ ha Gurdaspur Sector ha ka sngi Palei. Ha ka por ba la tohkit ïa u, u la phla ba ka kyrteng jong u ka dei u Aamir Raza, u nongshong shnong jong ka Sialkot distrik jong ka Pakistan.
