Shillong, Lber 10:
U State President ka National People’s Party (NPP) bad MP ka Rajya Sabha, Dr. W. R. Kharlukhi u la ong ba ki jingkynnoh bamsap pyrshah ïa ka Sorkar MDA ha kine ki san snem ba la dep ki long tang ki buit politik ban pynsaphriang ïa ki jingtip ba bakla.
“Phi ïohi, kaei kaba nga ju ong, nga ju kren shai haba kren sha ki lad pathai khubor ba kine baroh kim dei kiei-kiei hynrei tang ki buit politik ban pynsaphriang ïa ki jingtip ba bakla,” la ong u Dr. Kharlukhi haba kren sha ki lad pathai khubor ha ka Sngi Thohdieng halor ka jingshah kynnoh bamsap ka Sorkar MDA (MDA-I).
U la ong ruh ba ma u, u long uwei na kiba pyrshah bha ïa ka bamsap, hynrei lada don kino-kino ki jingkynnoh, dei ban da pynshisha bad uta uba shah kynnoh u dei ban shah pynshitom katkum ka aiñ.
“Nga khmih lynti ba kito kiba ju pynsngew ïa kane ka mat, ki la ïoh lad ban long nongthaw aiñ…ki lah ban wanrah ïa ki sabut jong ki hangto bad ki lah ruh ban wad ïa ki sabut. Ki nongmihkhmat ki lah ruh ban shim ïa kane ka bynta, ki lah ban leh ïa kane, ka RTI ka don bad mih shakhmat bad ngin sa ïa peit,” la ong une u MP.
Haba kdew ba ki paidbah ki la ‘vote’ biang na bynta ka MDA, u Dr. Kharlukhi u la ong, “Ngi don ïa ka Sorkar MDA bad ki paidbah sa shisien ki la ai ka rai ha ka MDA. Namarkata, wat hapdeng jong shibun kiei-kiei, ngi la ïoh ban ïatehlok biang bad ki seng jong ngi.”
Halor ki jingkhmih lynti jong u ïa kane ka Sorkar bathymmai hapoh ka jingïalam ka NPP, utei u nongïalam ka seng u don ka jingkyrmen ba kane ka Sorkar kan wanrah ïa ki prokram bapher-bapher na bynta ki samla khamtam ha ka liang ka seng kam seng jam, kam jngoh kai nalor kiwei-kiwei.
U la ong ruh ba la kumno-kumno ha kine ki san snem ban wan u kwah ban ïohi ïa ka jingshimkhia da kaba wanrah ki lad ki lynti bathymmai haba phai sha ka jingkyrduh kam jong ki samla naba ki don shibun kiei-kiei kiba lah ban leh hapoh ka Jylla.
“Kane ka dei kaei kaba nga sngew ba ka Sorkar ka dei ban leh,” la ong biang une u MP.
Shuh shuh u la bynrap ba ka Kynhun Myntri bathymmai jong ka Sorkar MDA-II ka long kaba tbit bad u khmih lynti ba kan treikam bha bad shakri hok ïa u paidbah ka Jylla.
