Shillong, Lber 10:
Ka jingtrei borbah ki pulit ban peitngor bad buddien ïa ki briew kiba donkti ban khaïi drok bad dih drok, ka la pynlong ïa ki ban ïoh kem haduh 234 ngut tang ha u snem 2022 bad ka jingïoh kurup drok ka la shongdor haduh T. 50 klur.
Haba kren sha ki lad pathai khubir, u Director General of Police (DGP), u L R Bishnoi u la ïathuh ba kane ka jingïoh kurup drok bad ïoh kem ïa ki briew ha u snem 2022 ka dei kaba la tam ban ïa ka jingdon kiba shahkem bad jingkurup drok ha ki 50 tylli ki snem.
U DGP u la ïathuh ba na ka shi kilo u heroin, lah ban pyndonkam kumba 2,000 ngut ki nongdih drok.
“Ngi la ïoh 234 ngut ki nongkhaïi drok bad ki nongpyndonkam drok kiba kynthup 20 ngut ki kynthei bad na kane ka jingïoh kurup drok, ka shongdor kumba T.50 klur,” la ong u Bishnoi.
U DGP u la ïathuh ba ka jingïoh kurup ha u snem 2022 ka tam lut ïa baroh ki jingkurup kiba la ïoh ha ki 50 tylli ki snem ha kane ka Jylla ha kaba ki don 116 tylli ki jingujor kiba pynngat.
Haba pynpaw ka jingsngewkhia, u DGP u la ong ba ka jinglong jingman ka pyni ba ka jingwan u drok ka nang jylla da kaba peit thuh na ka jingdon kiba shahkem bad jingïoh kurup bad jingdon ki jingujor kiba la dep pynngat.
U la ong ba tang ha kine ki 70 sngi, ki la don 80 ngut kiba shahkem ha kaba la kurup ïa u heroin kumba 3 kg, u ganja 140 kg, 60,000 ki dawai kuli, 22,000 tylli ki bitor dawa cough syrups bad T. 28 lak ka pisa.
U DGP u la pyntip ruh ba na 25 na ka 100, kiba shahkem ki dei nongkhaïi drok nabar Jylla kum na Tripura, Mizoram bad Manipur nalor kiba dei na Punjab, Bihar bad Bengal.
U la pynpaw ka jingkhuslai namar bun bha ki nongkhaïi drok kiba shahkem bunsien ki ïoh jamin noh bad u la ong ba ka jingslem ban ïoh ïa ki kaiphod na Forensic Science Laboratories (FSL) ka pynlong ïa ki ban ïoh jamin. U la ong ba bun bha kiba ïoh jamin ki ju bteng ban leh biang ïa kane ka kam sniew.
U DGP u la ong ba kine ki nongkhaïi drok ki ju ai ei shwa ïa ki nongdih katto katne por, bad hadien ba ki la sdang ngop, ki sa sdang ban die khnang ba kan heh ka ïew khaïi drok jong ki.
Na ka liang ka tnat pulit ka la thaw ruh ïa ka supervisory committee kaba khlieh da u SP (CID) ban peit ïa ki jingujor kiba ïadei bad u drok bad ban pynsted ban phah ïa ki chargesheet bad ban nym tlot ki jingmudui ha ïingkashari.
U DGP u la ong ba kine ki jingïoh kurup drok ki dei tang kiba shityrsim lada ïohnujor bad ka jingdon u drok uba khaïi bad pynïaid iew. Kumta u la khot la wer ïa baroh ban ai ka jingïatreilang naduh ki bor shnong, bad ki nongshong shnong khnang ban lah ban pynkdiah ïa ka jingïadei hapdeng ki nongkhaïi bad ki nongdih drok.
