Shillong, Lber 10:
U Myntri ka tnat pule puthi bathymmai ka Jylla, u Rakkam A Sangma u la ong ba kum u khun jong u nonghikai, bad kum u nonghikai, un pyrshang ban leh kaba bha tam eh haba ïadei bad ka pule puthi ha kane ka Jylla.
U Rakkam u la pynpaw ïa kane haba la buh jingkylli ki nongthoh khubor ïa u, kaei kaba hakhmat eh kaba u buhthong ban leh na ka bynta ban kyntiew ïa ka pule puthi ha kane ka Jylla.
U Rakkam uba la ai khublei ïa u Myntri Rangbah, u Conrad K Sangma uba la ibit ban bynshet ha u ka jingkitkhlieh ban khmih ïa kane ka tnat, u la ong, “kum u khun jong u nonghikai, bad ma nga uba la long u nonghikai, ngan pyrshang ban leh kaba bha tam eh na ka bynta ka pule puthi ha kane ka Jylla. Ka pule puthi ka dei ruh kaba nga da sngewtynnad eh bad nga kwah shisha ban ai ka jingshakri kaba bha tam. Ym lah ban ong ba ngin lah lut ban weng ïa ki jingeh baroh 100 na ka 100, hynrei da ka jingïatreilang, ngin pyrshang ban leh kaba bha tam eh.”
Nangta u la ong ban pynïoh ïa ka jinghikai kaba bha tam ïa ki khun ki kti ka dei ka thong, u la ong ba kane ka dei kaba donkam eh, da kaba ngeit skhem ba lyngba ka jingïatreilang bad ka Sorkar naduh ki nonghikai bad baroh kiba donbynta ha ka pule puthi, yn sa lah ban ai ka jingshakri kaba bha tam na ka bynta ka jingmyntoi ki khynnah skul bad ki samla pule.
“Ka pule puthi ka dei ka lawei jong ngi bad nga kwah ba baroh kin donbynta lang naduh ki seng bapher bad ki seng jong ki nonghikai kumno ba ngin tei bad pynbha ïa ka pule puthi,” la ong une u Myntri ka tnat pule puthi.
Halor ka jingeh kaba ka tnat pule puthi ka ju mad na ka por sha ka por haba ïadei bad ka tulop jong ki nonghikai, u Rakkam u la ong ba ïa kane ka jingeh kaba la ju don hap ban wad ki lad ki lynti kumno ban nym mih jingeh bad na ka liang jong u, u la dep ïakren ruh bad u Myntri Rangbah naduh ka sngi ba la bynshet ha u ban peit ïa kane ka tnat.
Halor ki skul Sorkar ki bym don nonghikai bad leh mon ki nonghikai bad bym biang ki ïing skul, u Myntri u la ong ba ka Sorkar MDA kaba la dep, ka la shimkhia bha ha kaba la pyni ïa ki kam ban maramot ïa ki ïing skul kiba la jot rathai da ki spah tylli bad ki dang don ki skul kiba dang donkam ban maramot.
Halor ki skul kiba don ki khynnah tang 9 ngut shapoh, bad kiba donkam ban khang noh, une u Myntri u la ong ba haba ïadei bad kane ka bynta, un dang hap peit bniah bha, namar haba shim ïa ki sienjam na ka bynta ka jingbha, ym dei ban shahktah ki khynnah bad ki nonghikai.
Haba kylli halor ka jingdon bun jait/kyrdan ki skul ha kane ka Jylla kiba lah ban long ka daw ban pynhiar ïa ka rukom ai jinghikai, u Rakkam u la ong ba um sngew dei ban kynnoh ba ka jingdon bun jait/kyrdan ki skul kan dei ka daw, hynrei ki lah ban don bun ki daw kiba ktah ïa ka pule puthi.
U la pyni nuksa ba wat ki skul kiba khmih bad pynïaid da ki kynhun shimet, ki lah bha ban ai ka jingshakri bad ka jinghikai kaba bha tam wat lada ka tulop kam dei kaba heh.
“Namarkata, ka jingdon bun jait/kyrdan ki skul kam dei satia ka daw, hynrei ki don bun kiwei pat ki daw kiba donkam ban shim ïa ki sienjam ban pynbha,” u la ong.
Ki jait skul kiba don ha Meghalaya ki kynthup ïa ki skul ba peit ba khmih da ka Sorkar (Government Schools), nangta ki skul kiba shu kyrshan ka Sorkar kum ki Deficit School, Deficit Pattern School, Adhoc School, SSA School, Science and Hindi Grant-in-Aid School.
Ki don ruh ki private school lane ki skul ba peit ba khmih da ki riewshimet bad kynhun shimet bad ki skul ba pynïaid da ki kynhun bapher bapher kiba khlem shaniah ha ka Sorkar.
Ka jingdon bun jait palat ki skul ha Meghalaya ka la ktah bha ïa ka pule puthi kata ïa ki khynnah bad ki nonghikai kiba hap ban trei bad pyndep kajuh ka kam, hynrei ka tulop pat ïapher hapdeng jong ki.
