New Delhi, Lber:
Ka kynhun Enforcement Directorate (ED) hynnin ka sngi ka la pynlong ïa ka jingleit khynra sha ki 24 tylli ki jaka kiba don ha National Capital Region (NCR), Patna, Ranchi bad Mumbai kynthup ha ka jaka sah jong u Symbud Myntri Rangbah jong ka Bihar u Tejashwi Yadav kaba don ha Delhi ha kaba ïadei bad ka jingshah kynnoh donkti ha ka jingkamai ïa ka spah bymhok kaba la mih na ka jingïapeiñ jaka puta bad ka jingai kam.
Ki heh kiba la don ka jingtip kaba bniah halor kane ka bynta, ki la ong “ïa ka jingleit khynra la pynlong da ka jingtreikam jong ka Prevention of Money Laundering Act (PMLA) khnang ban dup ïoh sabut.”
Ha basdang jong kane ka taïiew, ka kynhun Central Bureau of Investigation (CBI) ka la kylli jingkylli ïa u Lalu Yadav kaba la long ha ka sngi Ba-ar ha Delhi bad ïa ka Rabri Devi ha Patna ha kaba ïadei bad kane ka jingjia. Ha kaba ïadei bad ka jingshah tohkit jong ki kmie ki kpa jong u, u Tejashwi u la ong ha ka lah sngi U Blei ba ka jingleh jong ka kynhun CBI ïa ka longïing longsem jong u ka long ba ka la don ha ka liang pyrshah jong ka seng Bharatiya Janata Party (BJP).
“Ka la paw shai ba kine ki kynhun tohkit ki don ha ka bynta ban pyntreikam ïa ki aiñ pyrshah ïa ki seng saiñ pyrthei kiba long pyrshah ïa ka seng BJP bad ïarap ïa kito kiba don ha ka liang ne kiba ïatreilang bad kane ka seng,” la ong u nongïalam jong ka seng RJD ha ka jingïakren bad ki nongthoh khubor habar ka Bihar Assembly ha ka lah sngi U Blei.
Ka kynhun CBI ka la buh da ka jingujor ejahar ha kaba ïadei bad kane ka jingjia ha ka 18 tarik, Jymmang jong u snem ba la lah ha kaba ka la pynpaw ïa ki kyrteng jong u Yadav, Rabri Devi bad ki arngut ki khun jong ki kiba kynthup ïa ka Misa Bharti bad ka Hema Yadav nalor kiwei pat ki heh sorkar ki bym pat lah ban ithuh.
Ka la dep ruh ban khynra ïa ki 16 tylli ki jaka, kynthup ki jaka sah jong u Lalu bad Misa ha katei ka por. Shuh shuh la pynshisha ruh ba ha ka por ba u Prasad u dang bat ïa ka shuki Myntri bad uba dei khmih ïa ka tnat Railway naduh u snem 2004-09, ki la don kumba 12 ngut ki nongthep kam ki bym dei hok kiba la shah thungkam ha ka tnat Railway, ha kaba kane ka dei ka jingpynkheiñ ïa ki kyndon ba la buh jong ka Indian Railways for Recruitment.
Kam shym la don kano kano ka jingpynbna ne ki jingpynbna paidbah ban pynmih ha kaba ïadei bad ka jingthungkam hynrei ki katto katne ngut ki nongshong shnong jong ka Patna ki la shah thung kum ki nongïarap ha kiba bun ki jaka treikam jong ka tnat Railways kiba don ha Mumbai, Jabalpur, Kolkata, Jaipur bad Hazipur.
Kumba la ïathuh ka tyllong khubor, la ong ba kine ki nongthep kam, beit beit ki la leit ïakynduh ïa ki dkhot jong kane ka longïing, ha kaba la pynshisha ba ki la die da ki jaka sha ki dkhot ka longïing jong u Prasad ha ka dor kaba rem kaba la long da bun shah na ka dor jaka ba la dei ban die.
Halor ka jingkhmih bniah ha baroh ki liang, la ong ba u Lalu Yadav bad ki dkhot ka longïing jong u ki la ïoh da kumba 1,05,292 phut sawdong ka jaka kaba don ha Patna lyngba ka jingdie ïa ki san bynta bad ar bynta kiba la shu ïoh sngewbha na ki longïing jong kine ki 12 ngut, kiba la ïoh ïa ka kam Group D ha ki 6 tylli ki Zone jong ka tnat Railways.
