Kyiv, Lber:
Ka Ukraine ha ki ar sngi ba la leit, ka la shah hiar thma jur biang ha ka Russia katba ka jingiakhun hapdeng kine ar ri ka dang jur bha ha nongbah Bakhmut.
Ha ki khyndiat por ba la leit, ka Russia ka la pynjulor ia shibun tylli ki shlem treikam jong ka Ukraine ha kaba shibun tylli ki shlem pymih bor ding jong ka Ukraine ki la julor bad kiba bun tylli ki nongbah jong ka Ukraine ki la hap ban shong dum khlem ka bor ding. Kaba kham sngew sangsot ka long ba katei ka jingleit ther ‘namding dusmon jong ka Russia sha ki shlem treikam jong ka Ukraine, ka leit jia ruh ha ka por tlang, ha kaba ki paidbah ki hap ban mad ia ka jingkyrduh um, ki lad jingpynsyaid namar ka jingbym don bor ding wat hapdeng ka jingkhriat bad jing deitthah kaba jur jong ka tlang.
La ong ba ha ka step Sngi Palei, ki nongshong shnong ka Ukraine ki la ïohsngew ia ka sur jingbthei ki ‘namding jong ka Russia hapoh Kyiv, kaba long ka nongbah jong ka Kharkiv sha ki thaiñ Northeast bad Southwest jong ki bynta ka Odesa, ha kaba kiba bun ki thaiñ jong ka Ukraine ki la hap ban shong dum khlem bor ding namar ka jing julor jong ki shlem pynmih bor ding na kitei ki bynta.
U heh ka nongbah Kyiv u la iathuh ba ki la don ki jingbthei ha bun tylli ki bynta jong katei ka nongbah ha ka step Sngi Palei bad kumba 15% na ki iing kiba don hapoh jong katei ka nongbah ki la hap ban shong khlem bor ding.
Kumta, ki bor pyniaid ka Ukraine kin hap ban ialeh katba lah ban pynbit pynbiang ia ki jingdonkam jong ki paidbah ha katei ka thaiñ bad ha ka por kaba biang.
Kumjuh ruh u Lat jong ka nongbah Kharkiv, u la iathuh ba ha katei ka step, ka Russia ka la ther kumba 15 tylli eiei ki ‘namding bad kata ruh ka long katkum ka jinglah ban ïohsngew da ka shkor.
Namar la ong ba ka Russia ha kane ka por, sa shisien pat ka la thombor bad siat dusmon biang sha ki shlem treikam bapher jong ka Ukraine, khnang ban pynthud bad pynjynjar ia ki paidbah nongshong shnong jong ka ri Ukraine bad ruh khnang ba ka Ukraine kan mad jingeh bad kan pyndem noh ialade ha katei ka thma.
Haba iadei bad kane, la ong ba ki bor pyniaid ka Ukraine kim pat lah ban ai jingtip halor ki jing julor bad kumjuh ruh haba iadei bad ka jingdon jong kiba la shah ktah bad ngat ha katei ka jingjia.
Namarkata, la ong ba u Lat jong ka Odesa ha katei ka step, u la pyntip ba ki shipai ka Russia ki la sdang ban thombor biang sa shisien pat ia katei ka nongbah bad ha kane ka kynti, kitei ki ‘namding jong ka Russia ki la leit ban bthei ha ki shlem treikam jong ka ri bad kumjuh ruh wat ha ki iing ba sah briew.
Hynrei, u la ong ba ka long kaba kham sngewtynnad ba ym shym la don kiba ngat ne mynsaw ha katei ka por, namar la pynlip noh ia ka bording ha katei ka thaiñ baroh kawei hi tang mar ia ïohsngew ia ka jingther ‘namding jong ka Russia.
Kane ka jingjia ka long ruh hadien ba ka Russia ha kine ki khyndiat sngi ba la leit, ka la kam ba ki shipai jongka ki la jan ioh knieh ia katei ka nongbah Bakhmut, kaba ki la iakhun shitom da ki bnai.
Kumta ruh la ong ba ki bor pyniaid ka Ukraine ki la iathuh ba ka Russia ka la phah ia shibun bah ki shipai, ki liengsuiñ bad namar ba ka jingiakhun ka la iakhaid, ka Russia ka la pyrshang ban pynkhlaiñ da kaba phah kham bun ki shipai iakhun sha katei ka nongbah.
Namar kata ruh ki heh ka Ukraine ki la pynpaw ka jingbym sngew shngaiñ ha kane ka kynti bad ki la ong ruh ba lehse katei ka nongbah kan sa hap hapoh ka kti jingsynshar jong ka Russia ha kano kano ka sngi bym lah tip.
Shuh shuh ruh ki heh ka Ukraine ki la ong ba lada ka Russia kan ioh lad ban knieh ia katei ka nongbah, kan dang pynsuk shibun ruh ia ka ba kan ioh ban kurup bad knieh lut syndon ia kiwei pat ki nongbah jong ka Ukraine bad namarkata ki la kyrpad ia ki para ri ba marjan ba kin pyn kloi noh ia ki lad jingiarap kumba ki la kular naduh ki khyndiat por ba la leit.
Hynrei ki heh ka tnat shipai iada jong ka Ukraine, ki la ong ba ka jinglah jong ki shipai ka Ukraine ban iakhun bad iada ia u pud- u sam jong katei ka nongbah mynta da ki bnai, ka long ka jingjop ia ki bad ia ka Ukraine baroh kawei. Namar watla ka Russia ka don ia shibun bah ki shipai bad kumjuh ruh ki tiar iakhun thma kiba khlaiñ bor, hynrei ka Ukraine kam shym la khyllem satia bad ki shipai ka Ukraine kim shym la liem noh ha ka jingiakhun bad ki shipai ka Russia, pynban ki ia- aireng markylliang bad wat ka Russia ruh ka la mad ia shibun bah ki jingduhnong.
Shuh shuh ruh la ong ba, katba ka Russia ka nang byrngem ban pyni bor bad ban pyndonkam da ki tiar kiba kham khlaiñ bor ha ka jingleit hiar thma jongka ia ka Ukraine ha kine ki sngi ban wan, hynrei ka Ukraine ruh khlem da pyndem, ka la smai ba kan ym kynran dien ne pyndem da leilei ruh hakhmat ka Russia bad ba kan hap ban iakhun tyngeh ruh ba kan ioh biang ia baroh kito ki bynta kiba la hap hapoh ka kti jong ka Russia wad naduh ki snem ba la leit tad haduh kane ka kynti.
