Shillong, Lber 10:
U MP ka Lok Sabha na Shillong konstitwensi bad uba dei ruh u President ka Meghalaya Pradesh Congress Committee (MPCC) Bah Vincent Pala, u la rai ban ïakhun beit na ka Congress ha ka ilekshon MP ka ban long ha u snem 2024 watla ki kyrtong ba ka Congress ka pynïeng ki jop tang saw ngut na Khasi Jaiñtia bad uwei na rilum Garo.
U Bah Vincent Pala u la ong ba ka jingmih noh ki MLA na ka seng ha ryngkat lang bad ki nongkitkam na ki konstitwensi bapher bapher ka la buh jingeh ïa ka seng ban pynïeng da ki kyrtong kiba biang.
Haba kylli la phin ïakhun biang na ka Congress ha ka ilekshon MP ha u snem 2024, u la ong biang ba lada rem ne jop un ïakhun beit na kane ka seng kaba la pynjop ïa u ha kine ki snem ba la dep.
“Mynta nga la don ha Delhi ban leit shong dorbar Parliament naduh ka 13 tarik Lber 2023 ka la sdang biang bad hadien ka dorbar ngan wan ban lum jingïalang ban pynkhlaiñ biang ïa ka Congress ban pynkhreh noh ïa ka ilekshon MDC bad MP ha u snem ban wan” u la ong.
Haba kylli balei phi rem noh ïa ka ilekshon MLA na Sutnga, u la pynpaw ba um lah shuh ban pynlong jingïalang bad ki nongkyrshan namar ka por ka la lyngkot palat, sa kawei u hap ban leit ban pynlong jingïalang ha kiwei ki konstitwensi khnang ban pynkhlaiñ ïa ka Congress.
Shuh shuh u la ong ba ka jingïoh ka Congress 5 ngut ki MLA bad ka TMC 5 ngut ki MLA ka la pynlong ïa kiba bun ki MLA bad ïa ki kyrtong kiba la mih na ka Congress ba kin babe hadien ba ki la shah rem.
“Lada baroh kito ki MLA bad ki kyrtong ki ïakhun na ka seng Congress, nga ngeit ba mynta ngi la synshar hi ïa ka sorkar, hynrei watla katta ruh ngi dang ïoh haduh 5 ngut ki MLA kiba jop ha ka ilekshon” u la ong.
U Bah Vincent Pala u la kyntait ruh halor ka jingkynnoh ki briew ba u lah ban leit ïakhun na ka seng NPP ha ka ilekshon MP Lok Sabha ha u snem 2024 hadien ba ka seng Congress ka la tlot ha ka ilekshon MLA.
