Shillong, Lber 10
Ha kawei na ka jingïoh kurup drok ba shyrkhei, ki pulit ka East Khasi Hills ha ka Sngi Palei ki la ïoh kem ïa saw ngut ki briew, ba kynthup ïa arngut ki kynthei, na ka dong Lumsohphoh kaba don ha Lower Mawprem, Shillong bad ki la kurup ïa u drok Heroin ba don 268.71 gram bad ka pisa T. 6,87,150.
Haba pyntip ïa kane, u SP ka East Khasi Hills, u Dr MG Raghavendra Kumar, ha ka Sngi Thohdieng u la ong ba hynnin ka sngi, ki pulit ka ANTF ki la ïoh kurup shwa 66.46 gram u drok Heroin hajan ka shlem treikam ka Khasi Hills Autonomous District Council (KHADC) bad ki la ïoh kem ïa uwei u briew.
Nalor u drok, la kurup artylli ki Mobile Phone bad kawei ka kali Hyundai Eon.
Shuh shuh u Kumar u la ong ba hadien kane, ki pulit ki la leit sa sha Lumsohphoh ha Lower Mawprem bad hangne ki la ïoh kurup sa 268.71 gram na kawei ka ïing.
U la ong ba nalor u drok bad ka pisa, la kurup ruh ïa 7 tylli ki Mobile Phone, 60 tylli ki thyrnia injek bad kiwei.
Na ka liang u DGP ka jylla, u Dr LR Bishnoi, u la ong ba katkum ki kyndon jong ka aiñ NDPS Act, ka jingpynsaja ïa ki nongkhaïi drok ka long katkum ka jingïoh kurup drok. Lada ka jingïoh kurup drok na uno uno u briew ka long palat ïa ka 250 gram, ka jingpynsaja ka long ba kito kiba shah kem kin hap shong patok na ka bynta 20 snem.
