Ha kine ki sngi, ngi la ïohi sa tang ki jingjia ba sngewtriem. Ha ka sngi ñiew ‘vote’ ki la don ki jingkulmar ha Mairang ha kaba ki paidbah ki la leit tur sha shlem treikam u Deputy Commissioner namar ki khlem sngewhun ïa ka jingñiew ‘vote’ haduh ba la poi u pud ba ka la don ka jingthang kali. Ka la don ruh ka jingshah pynjulor jong ki ïing ki sem ha Sahsniang kaba hap ha Mowkaïaw konstitwensi ha West Jaiñtia Hills namar ka jingshah rem jong uwei u kyrtong na kawei ka seng. Ka la don ruh ka jingpynkulmar ha Sohra namar ki paidbah ki khlem sngewïahap bad ka jingmih na ka jingñiew ‘vote’. Hadien kine, la mih sa ka jinglap ïa ka metïap jong uwei u samla rangbah uba na ka shnong Mawlaingut narud ka Wah Umïam katba uwei u rangbah briew u la shah pynïap dusmon ha ki runar ha ka shnong jong u kaba don ha Pahammawleiñ 20 Mer ha Ri Bhoi. Nangta, ka la don ruh sa ka jingshah dung jong uwei u dkhot ka seng HITO ha ka shnong Mukhla Sohshrieh haduh ba un da mynsaw jur.
Kine ki jingjia ki buh jingsyier ïa ki paidbah khamtam ïa kito kiba mad ïa ka jingshah thombor. Ka jingjai-jai ka la wanphai kum ha Mairang, Sohra, Sahsniang tangba haba ïoh ban ïakren bad ki katto katne ngut ki nongshong shnong ka Sahsniang, ki la pynpaw ba ki dang sngewsyier wat tang ban mih na la ïing. Ha ka jingshisha, ki pulit ki la dei ban kem noh ïa kito kiba la donkti ban leit pynjulor ïa ki ïing ki sem jong ki briew tang namar ka jingshah rem ha ka ilekshon. Ha ka synshar paidbah, ym don ba lah ban pynbor mano-mano ban jied ïano-ïano. Ka shong ha ka rai jong ki paidbah ïano ki mon ban pynlong nongthaw aiñ. Hooid, ka don beit ka jingbitar lada shah rem u kyrtong ba ïa kyrshan, hynrei ym don hok ban leit wiang ding ne kawang maw ne pynmynsaw ïa kiwei kiba khlem ïa kyrshan lang. Ki pulit kim dei ban ailad ïa kiba kum kine ki nongpynkulmar shnong namar kam ïalam sha ka jingbha bad ka lah ban nang pynmih pynban ïa ki jingsniew. Lada tlot ki bor jong ka aiñ, shano ki paidbah kin phet ban ïoh jingïada?
Ka jingshah pynïap dusmon jong u samla na Mawlaingut bad u rangbah ha Pahammawleiñ 20 Mer bad ka jingshah dung jong u dkhot ka HITO ki thew sha ka jinghiar dor jong ka longbriew manbriew. Ym don shuh kata ka jingïatiplem kaba pynlong ïa ki ‘riew thrang snam ban leh ïa kaei kaba ki leh. Khlem jingmap ki shim beit im-im peit-peit ïa ka mynsiem briew. Sngew shyrkhei wat tang ban pyrkhat ruh ha kano ka dur ki lah ban leh kumta. Kiba bun te wat tang ban shah ot tari ha kti kim nud ban peit ïa ka jingjaw jong ka snam. Ka long kaba eh ban pyrkhat. Hynrei ka dei ka kamram jong ki pulit ban thwet ïa kito kiba donkti ha kine ki jait kam kiba sngewtriem bad kiba long pyrshah ïa ka longbriew ka manbriew. Ym don hok mano-mano ban shim ïa ka jingim jong kiwei. Lada don kano-kano ka daw, dei ban ujor sha ka aiñ ba kan leh ïa kaba donkam.
Ka jingshah dung jong u dkhot ka HITO ka long kaba sngew shyrkhei. Ngi kynmaw ba ka HITO lem bad ka HYC ki la ïa mih paidbah ha ka ilekshon kaba dang shu dep ban pynsngewthuh ïa ki nongthep ‘vote’ kumno ban jied ïa ki nongmihkhmat lane ki nongthaw aiñ. Ki la leit sha kylleng ki jaka jong ka Bri U Hynñiewtrep ha ryngkat bad ka sur ban pynsngewthuh. Lehse don kiba buh shun ïa kine ki seng namar ka la ktah ïa ki katto katne ki kyrtong kiba ïakhun? Ki nongïalam bad dkhot kine ki seng kim dei ban kheiñ sting bad kin hap ban long kiba husiar ha ka leit ka wan bad kim dei ban kheiñ shngaiñ namar lehse ki don bun ki nongshun kiba ap thap shane shatai. Lehse ki dang don kiba dang sngew wit ba kitei ki seng ki la leit ïalap ban pynsngewthuh ïa ki paidbah halor ka ilekshon.
Mynta ngin hap ban ap ïa ki pulit aïu kin leh halor kitei ki jingjia ki bapher bapher. Ka bor jong ka aiñ ka long kaba khlaiñ bad kam ju shimpor hi ruh ïa ki kam sniew ba kin mih shabar. Ngi kyrmen ba ki pulit kin trei shitom ban kem ïa kiba donkti bad ban pynsaja ïa ki ha ka rukom kaba dei khnang ba kan long ka jingsneng ïa kiwei kiba don ïa kiba kum kijuh ki jingmut bad jingthmu. Tangba ka long ruh kaba eh ïa ki pulit ban ïada ïa kiba kum kitei ki jingjia namar ka jinghiar arsut ka jinglong jingman jong ki briew. Kiba bun kim pyrkhat than shuh ïa kiwei bad ki leh ïa kiba bun jait ki kam sniew tang ban myntoi ïalade. Ka la dei ka por ïa ki kmie ki kpa ba kin sneng bha ïa la ki jong ki khun ba kin lait na ki kam sniew kam smeh bad ba kin long ki nongshong shnong kiba bha. Ngim lah ban shaniah tang ha ki pulit namar ka akor ka burom bad ka jinglong kynsai ka sdang shwa na la rympei. Lada khlaiñ na la ïing, ym don ba lah ban pynshoi ne pynbor ïano-ïano ban leh ïa ki kam pap kam sang. Ngi donkam namarkata, ban sdang shwa na la ki jong ki ïing ki sem da kaba ïalam ïa ki khun ki kti ha ka lynti kaba dei khnang ba kin lait na ki jingma.
