Beijing, Lber:
U Xi Jinping hadien ba shahjied ha ka sien ba lai kum u President jong ka China un shimti ia kane ka kam sa san snem. Ha kine ki san snem, nalor ba un ialam ia ka ri un hap ruh ban shimti kum u rangbah shipai lane u commander jong ki shipai ba khlaiñbor katei ka ri, ka People’s Liberation Army (PLA).
Da kane ka jingshah jied biang ka jong u ha kane ka kynti kaba lai, la shim ba u Xi Jinping un dei u nongialam bad u nongsynshar uba ar hadien jong u Mao Zedong uba la seng ia ka People’s Republic of China ha u snem 1949. U Xi u la dep ban mad ia kiba bun ki jingeh bad ki jingtynjuh ha kine ki san snem ba la lahs, khamtam ka jingiadei hapdeng jong ka China bad ka US kaba la mih na ka daw jong u khniang jingpang coronavirus, hynrei u ngeit skhem ba ha kane ka wat kaba mynta un ialeh katba lah ban pynkhlaiñ ia ki jingiada na ka bynta ka ri bad ruh ban pynbha ia ki jingiadei bad ki ri ka pyrthei.
Ha ka jingialang kaba heh jong ka Communist Party, ki don sa hynriew ngut ki heh sorkar kiba la shakri lang ha kane ka sorkar ba la ialam da u Xi bad kitei ki dei kiba bat ia ki kyrdan kiba kongsan bad kiba kham hajrong ia kaba la tip da ka Politburo Standing Committee.
Ka kamram kaba nyngkong mynta ka jong u Xi ka long ban nang kham pynkhlaiñ shuh shuh ia ki lai tylli ki tnat shipai jong ka People’s Liberation Army (PLA) na ka daw jong ki jingma kiba lah ban ap na kiwei pat ki ri bad nalor kane un hap ban nang pynjan ia ka jingiadei bad ka US khnang ban lait na ki jingshah pyrkhing bad shah buh kyndon (sanction), kumba ka US ka la ju pynjari sha kito ki ri kiba iaid lait bad ialeh pyrshah ia ki rukom treikam jong ka.
Ka phang pdeng kava mynta ka long halor ka jingiadei hapdeng ka China bad ka Russia, khamtam ha kane ka por ba ka jingshah hiar thma ka Ukraine ha ka Moscow ka la nang kham jur bad nang pur sha kiwei pat ki bynta bad ki nongbah bad na ka liang jong u Xi naduh basdang jong kane ka thma um pat shym la pynrem ia ka Russia, watla ka US bad ki ri ka NATO ki la kynnoh ba ka China ka la shalan bad iarap pynpoi ia ki tiar thma sh Russia na ka bynta kane ka jing-iakhun.
